गोदान दिल्ली, 10 सेप्तेम्बरः मुलुगनि गुबुन गुबुन हादतफोरजों लोगोसे भारतयाव दासान्दि थादनाय गैयैबायदि गिथावनायै कभिड-19 नि साग्लोबनाया बारायबाय थानायखौ नुनो मोन्दों । कभिड-19 नि गोसारनायखौ होबथानायनि फार्से भारत सरकारआ गोबां गोब्राब जानायनि गेजेरावबो दासिम हादतनि गेजेराव भाइरासजों सन्देरजानाय सुबुंनि अन्जिमाया गासै 44.03 लाख जाहैबाय। बेजों लोगोसे करना सन्देरनाय जाथायाव भारतया मुलुगनि गेजेरावनो नैथि सारियाव जायगा लानानै दं। सिगां सारियाव आमेरिकाया दं होन्नानै सुबुंनिफ्राय मिथिदों।
भारत सरकारआ कभिड-19 नि गोसारनायखौ होबथानो थांखिजों मोनसेनि उनाव गुबुन मोनसे गोनां हाबाफारि आरो राहाफोरखौ आजावना लानायनि गेजेरावबो सिगांनिख्रुइबो बे समाव भाइरासजों सन्देरजानाय सुबुंफोरनि जौखोन्दोया बांसिन जानानै दं। भारतयाव 44 लाखनिफ्रायबो बांसिन करनाजों सन्देरनाय पजिटिभ केसआ सोलिबाय थानायजों लोगोसे दासिम सा 34 लाख सुबुंफोरा फाहामथायनि गेजेरजों मोजां हालदोआव फैफिन्ना न' फार्से गिदिंलांफिन्नो हादों। भारतनि उनाव ब्राजिलआबो कभिड-19 जों सन्देरजानाय सुबुंफोरनि फारिलाइआव थामथि जायगा लानानै दं। ब्राजिलआव दासिम 34 लाख 97 रोजा सुबुंफोरा फाहामथाय लानायनि गेजेरजों मोजां हालोदआव फैफिन्नो हादों। बेनि गेजेराव ब्राजिलआव कभिड-19 नि एक्टिभ केसआ दासिम 9 लाखनिबो बांसिन जानानै दं। भारतयाव सानफ्रामबो 80 रोजानिबो बांसिन कभिड-19 जों सन्देरजानाय सुबुंफोरनि रिपर्टखौ मोन्नो हानायाबो हादतनि थाखाय जिंगा सिथावना आरो गिथावना जादों।
गुबुन फार्सेथिं कभिड-19 नि गोसारनाया गिथावनायै गोहोम गोग्लैनायनि समावनो रांखान्थिखौ नोजोर होनानै भारत सरकारआ रेलवे सिबिथायखौ जागाजेनफिन्नो थांखि लाबाय। बेबादिनो दिल्लीयाव मेट्र रेलनि खारनायखौबो जागायजेनफिन्नो थांखि लादों। नाथाय बेबायदि गिथावना थासारिनि गेजेरावबो मेट्र रेलखौ खारहोफिन्नो थांखि लानाया सुबुंफोरनि थाखाय फैगौ समाव बेसेबां रैखाथि गोनां जागोन आरो बेसेबां गिथावना जागोन बेनि सायाव फैगौ समासो फोरमायगोन।
गुबुन फार्सेथिं मुलुगनि गेजेरावनो दासिम 2.77 कौटि पजिटिभ केसखौ मोन्नो हादों। बेनि गेजेराव फाहामथायनि गेजेरजों 1 कौटि 98 लाख 52 रोजा 170 सुबुंफोरा मोजां हालोदआव फैफिन्नो हादों। नाथाय करना भाइरासनि हेथायै जुजिनानै फाहामथाय लानायाव दासिम 9,02,543 सुबुंफोरा जिउ गोमाबाय।
