बि टि सिनि बिसायख थियाव गोखों रैखाथिनि राहा थिसन्नो फरायसा आफादफोरनि दाबिगिबि मन्थ्रि सनवालनो गोसोखां बिलाइ गथायदों

कक्राझार, 23 नभेम्बरः गोबाव बोसोर सम दिन्दांनानै थानाय बि टि सिनि बिसायख'थिया फैगौ 7 आरो 10 डिसेम्बरखालि मोन्नै खोलोबाव खुंगासिगोनखौ नोजोर बोनानै बि टि सि हालामनि गासै आफाद गौथुमफोरनो बिसायख'थिखौ गोजोन आरो उदाङै खुंफुंनो हानाय बायदि बिसायख'थिनि समाव गोख्रों रैखाथिनि राहा जगायथिनो थाखाय खुंथायखौ खावलायदों। बेबायदिनो मोन 16 फरायसा आफादफोरनि क-अर्डिनेसन कमिटि अफ बड'लेन्ड टेरिटरियेल रिजन अफ अर्गानाइजेसनआ 22 नभेम्बर रबिबारखालि आसामनि गिबि मन्थ्रि सर्बानन्द सनवालखौ लोगो हमनानै बि टि सि बिसायख'थिखौ गोजोनै आरो उदाङै लुफुंनो हानाय बादि गोख्रों रैखाथिनि राहा जगायथिनानै होनायनि राहा लानो हास्थायनानै गिबि मन्थ्रिनो गांसे गोसोखां बिलाइ गथायो। जाहाथे बिसायख'थिनि समाव जेबो रोखोमनि हिंसायारि आरो दुंहाव थासारिफोरा महर मोना।

फरायसा आफादआ गोसोखां बिलाइआव फोरमायथिनाय बादिब्ला सिगां समफोराव खुंजानाय बिसायख'थिफोराव माखासे राजखान्थि हान्जाफोरा राइजो-राजाफोरनि भटखौ दखलाव लानो थाखाय बिसायख'थिनि सानखालि रांनि थफ्ला बाहायनाय, गुबुनखौ हेंथा होनाय आरो बायदि माखासे आयेन बेरेखा खामानिफोरखौ मावयो। नाथाय बे खेबनि बि टि सि बिसायख'थियाव जाहाथे मोनबो रोखोमनि जाथायफोरा महर मोना लोगोसे बिसायख'थिखौ गोजोनै आरो उदाङै खुंफुंनो हायो बेनि थाखाय गोख्रों राहा लानांगौ होन्नानै फरायसा आफादा दाबि दैखाङो।