उदालगुरि, 3 सेप्तेम्बर: उदालगुरि जिल्ला दुलाराय बर' फरायसा आफादनि बान्जायनायाव थांनाय 2 सेप्तेम्बरखिल खैराबारिआव थानाय अलंबार गोजौ फरायसालिआव थांनाय 27 जानुवारीखालि बर'नि गुबुन गुबुन दोलो-आफादफोरजों जानानै थांनाय बि टि आर गोरोबथाखौ लानानै मेलेमजिबिफोरनि मोनसे गोनांथार मेलआ खुंफुंजायो। बे मेलेमजिबिफोरनि बाहागो लानायाव खुंजानाय हाबाफारिआव गाहाय आलासि महरै बाहागो लानानै दुलाराय बर' फरायसा आफादनि आफादगिरि दिपेन बर'आ गावनि बिबुंथियाव बुङोदि, थांनाय माखासे साननिफ्रायनो बि टि आर गोरोबथानि सायाव हाग्रामा महिलारिआ जेरैबादि बिबुंथि होनानै बि टि आर गोरोबथायाव जेबो गैया होन्नानै राइजो-राजाफोरखौ गोनो-गोथोआव खोख्लैनो नाजादों बै बाथ्राखौ बिथाङ गावनि राजखान्थि मुलाम्फानि थाखायसो बुंदों।
दिपेन बर'आ बुंबावोदि, जालांनाय बि टि आर गोरोबथानि गेजेरजों बर' हारिजों लोगोसे बि टि आरआव थानाय मोनफ्रोमबो हारि-माहारिआनोदि, मुलाम्फा जागोन बेखौ लानानै एसेबो गोनो-गोथो जानांगौ गैया। बि टि आर गोरोबथानि गेजेरजोंदि, बि टि आरआव मोनसे आबुं सोलायनाय फैगोन बेयो सैथो बाथ्रा। बेबादिनो गोरोबथानि गेजेरजों जायफोर दफाफोरखौ सोसन्नाय जादों बे गासैबो दफाफोरखौनो रग'रग' आसाम सरकार आरो भारत सरकारआदि, मावफुंगोन बेयो रोखा होननानै बिथाङा बुंबावो।
गोबां राइजो-राजाफोरनि आरो मेलेमजिबिफोरनि बाहागो लानाय मेलआव बर'आ फोरमायथियोदि, बि टि आर गोरोबथानि गेजेरजोंनो बर फोरनि गोलाव सम दिन्दांनानै थानाय सोलोंथाय जेंनाखौ बोस्रांनो थाखाय बर' बिफाननि जुनिया बिथोनगिरि फसंजानाया रोखा जाबाय आरो बेखौ फैगौ 5 सेप्तेम्बरखालि फालिजानो गोनां फोरोंगिरि सानआव सरकारआ फोसावनानै होगोन। बियो गोरोबथानिनोदि फिथाइ बेखौ बयबो मिबथिगौ।
