कलाइगाव, 28 सेप्तेम्बरः प्रमद बर'आ बिसाय'थि फोसावदिंनानै जेरावनो थाङो बेयावनो बिपिएफनि गोदान गोदान फिरफिलाखौ नुनो मोनो। रबिबारखालि खैराबारि बियाबनि सिङाव थानाय बुङाइ काटर रायजोराजाफोरनि गेलेग्रा फोथारआव खुंजानाय इउपिपिएल दोलोनि मोनसे गेदेर फोसावदिं हाबाफारिआव बाहागो लानानै गावनि बिबुंथिनि जागायजेन्नायावनो बेबादि बुङो इउपिपिएलनि आफादगिरि प्रमद बर'आ। बिथाङा बुंनाय बादिब्ला, बिसायख'थिआ खुंजायो एबा खुंजाया बेयो बिसायख'थि आयगनिसो बाथ्रा। थांनाय 17 बोसोरनाङै बिपिएफ सरकारआ दैबानानि थाखाय धर्ना होयाखै, सरकारि बिथिडै मदद होयाखिसै आरो दिनै बिसायख'थि खुंनांगौ होन्नानै राजा-लामायाव ओंखारबोदों मानोना हाग्रामा महिलारिआ फिन सिफ जानांगौ। बिथाङा आरो लोगोसे बुंबावदोंदि, बिसायख'थिआ थाबैनो जायोब्लाबो इउपिपिएल दोलोआनो सरकारखौ दागोन।
गावनि बिबुंथिनि गेजेरजों प्रमद बर'आ अजद होनाय बादिब्ला, जायफोर पिएमएवाइ, एमजिएनरेगा बिथांखिनि मुङाव गिलु-बालु जाख्ल'दों आरो गेना खालामदों बिसोरो जेलआव थांनांगोन। एमजिएनरेगानि जब कार्ड मुलाम्फा मोनगिरिफोरनि आखाइयाव थानो नांगौमोनब्लाबो बिपिएफनि दालाल आरो थिकादारफोरनि आखाइयावसो जबकार्डआ थायो। निखावरिफोरनि रां जाग्रा बिपिएफनि दैदेनगिरि आरो मावथिफोरजों लोगोसे ब्लकनि जिआरएस आरो इन्जिनियारफोरजों लोगोसे गासैबो जाख्ल'ग्रा मावसुमाफोरखौनो जेलआव दैथायहरनाय जागोन। बर'आ बुंबावदोंदि, जगाय बिफाननि मावफुं सोद्रोमाया खैराबारि बियाबनिनो। बिथांनि बिफानआवबो खालि गेना आरो गेनायानो दङ। बिटिआर गोरोबथायाव सागान होना साक्षि हाग्रामा महिलारिआ दिनै बिटिआर गोरोबथाखौ गाज्रि होन्नानै बुंदों। हाग्रामाया गोजोन फैनायखौ हास्थायाखै। दिनैनिफ्राय बिटिसि गैलिया बिटिआरसो जाबाय आरो हाग्रामानि सिमांनि बिटिसिआबो बिदाइ जाबाय। गाव होनाय गोरोबथाखौनो हाग्रामा महिलारिआ गोहोनि लबजों सुक्तिआ मोजां नङा होन्नानै बुंनाया मिनिथावना बाथ्रा।
