कक्राझार, 13 अक्ट'बरः बिटिसिनि खुंजानो गोनां बिसायख'थियाव जाय हान्जाया बां सानखो मासि देरहागोन बे हान्जाजों लोगो नांनानै बिजेपिआ सरकार दागोन। बे बाथ्राखौ बुंदों आसाम बिजेपिनि आफादगिरि रन्जित कुमार दासआ। राइज्यो बिजेपिनि आफादगिरि दासआ कक्राझाराव सान्नैनि हाबाफारिजों खुंजानो गोनां बिजेपि जनजाति मर्चानि राइज्योयारि मावफारिया मेलाव बाहागो लाफैनानै बुंदोंदि, खुंजानो गोनां बिटिसि बिसायख'थियाव बिजेपिआ हारसिङै मोन 26 बियाबफोराव बादायनो साखा-फारा जानानै दं। बे हिसाबै जाय हान्जाया बांसिन मासि देरहानो हागोन बे हान्जाजों लोगो नांनानै बिजेपिआ बिटिसिआव सरकार दागोन।
बिथाङ खौरांगिरिफोरजों मोगा-मोगि जानाय समाव बुंबावोदि, बिपिएफनि माखासे गागि आरो गिबि सारिनि दैदेनगिरिफोरा हान्जानि गेजेराव बेले-बेजे सोमजिनायनि थाखाय बिजेपि हान्जायाव हाबगासिनो दं आरो माखासे बिपिएफनि दैदेनगिरिफोरा बिजेपिजों फोनांजाब लाखिगासिनो दं। बिजेपि हान्जाया बिटिसि हालामाव 5 लाखनि बांसिन गोदान सोद्रोमाफोर थिसनखांबाय आरो ओन्सोलनि थागिबि सुबुंफोरनि जौगाथाय आरो अन्सायलुनि थाखाय खामानि मावगासिनो दं। बिटिआर गोरोबथाखौ मावफुंनायनि बेलायाव दासआ बुंबावोदि, बिटिआर गोरोबथानि समाव बिजेपि दैदेन्नाय आसाम आरो मिरु सरकारा खोथा होनाय बायदियै गोरोबथानि दफाफोरखौ मोनसेनि उनाव मोनसे मावफुंगासिनो दं। फैगौ 2021 आव खुंजानो गोनां राइज्यो बिधान सभा बिसायख'थिनि थाखायबो बिजेपिआ आबुङै साखाफारा होन्नानै फोरमायबावो।
