कक्राझार, 27 आगस्ट: दुलाराय आसाम माइन'रिटि फरायसा आफाद एबा आमसुआ बिटिएडि ओन्सोलाव माइन'रिटि सुबुंफोरनि सायाव उतखार खालामनाय आरो बुथारनाय बायदि जाथाय जाफ्लेबाय थानायखौ लानानै खुद्रिखांदों। फरायसा आफादया बिटिएडि ओन्सोलाव माइन'रिटि सुबुंफोरनि रैखाथि आरो थामोन्था होनायाव फेलें जानायनि थाखाय आसामनि गिबि मन्थ्रि सर्बानन्द सनवालखौ गोख्रों रावजों सोंखारिदों आरो माइन'रिटि सुबुंफोरनि सायाव नासयनाय, गादबनाय, उतखार खालामनाय आरो बुथारनाय बायदि जाथाय सोमजिनायखौ गैया खालामनो सरकारनिसिम गोख्रोङै दाबि देखाङो।
कक्राझार जिल्ला दालाय आमसुआ बे दाबिखौनो लानानै खुगायाव गोसोम जि खाथेनानै दिनै फकिराग्रामआव 2 घन्टा धर्ना होयो। मख'नाय जायोदि, बिटिसियाव सोलिफु राइज्यो बेंगिरि खुंथायनि आमोलाव थांनाय 5 दाननि गेजेराव सासे लाइमोन हिन्जावसाखौ लाफानानै खमैबो सा 5 माइन'रिटि सुबुंफोरखौ बुथारनाय जाथाया महर मोन्दों। बे आयदाखौ लानानैनो आमसुनि दैदेनगिरि आरो सोद्रोमाफोरनि देहायाव अर नांदों।
