(इउपिपिएल, बिजेपि, सुरक्षा पार्टिनि फिथाइया लाथिख’ जागोन)
बाक्सा, 27 आगस्ट: बिटिआर गोरोबथाया जिर', बिटिआर गोरोबथायाव जेबो गैया। बे गोरोबथायाव बर फोरनि रैखाथिनि बाथ्रायाल' दङ। गुबुन हारि-हारिसाफोरनि जेबो बाथ्रा मख'नाय गैया। बिटिआर गोरोबथायाव गुबुन हारिनि समान मोन्थाय गैया। नाथाय बिटिसि गोरोबथायाव मोनफ्रोमबो हारि-हारिसानि बाथ्रा रायखांनाय दङ। बिटिआर गोरोबथाया बर' हारिखौ फोजोबस्रांगोन।
बिटिआर गोरोबथाया जेब्लाबो मावफुंजानाय नङा। बेफोर गोख्रों बाथ्राखौ बुंथिदों बिटिसिनि बारग' गाहाय खुंगिरि हाग्रामा महिलारिआ। दिनै तामुलपुर महकुमानि सिङाव थानाय गयबारि ब्लक बिपिएफनि मावख'आव खुंनाय मोनसे हान्जायाव हाबनाय मेलनि जोबनायाव खौरांगिरिफोरजों मोगा-मोगि जानायाव बे बाथ्राखौ बुंथिदों। खौरांगिरिनि सोंथि खालामनायनि फिनआव महिलारिआ आरोबाव बुंबावोदि, फैगौ बिटिसि परिषद बिसायख'थियाव इउपिपिएल, बिजेपि आरो नब' शरनिया दैदेन्नाय गण सुरक्षा पार्टिनि फिथाइया लाथिख' जागोन।
बेनि अनगायैबो बिटिसिनि मोन 40 बियाबनि 40 बियाबआवबो बिपिएफ हान्जानि टिकेट मोन्नाय बिजाथिफोरा देरहाजोबनानै फिन बिपिएफ हान्जायानो बिटिसि खुंथाय गोहोखौ दखलाव लाफिनगोन होन्नानै दाबि खालामदों हाग्रामा महिलारिआ। बिथाङा बुंबावोदि, गयबारि परिषद बियाबआव बिपिएफ हान्जानि बिजाथिया देरहागोना रोखा। बेजों लोगोसे कक्लाबारिआवबो बिपिएफ हान्जानि बिजाथिआ देरहागोन होन्नानै दाबि खालामो।
इउपिपिएल हान्जानि आफादगिरि प्रमद बर'आ गसंनाय मोननै बियाबनि मोनसेबो बियाबआवनो देरहानो हाया होन्नानै महिलारिआ बुङो। फार्सेथिं खौरांगिरिनि मोनसे सोंथिनि फिनआव फैगौ 2021 माइथायनि बिधान सभा बिसायख'थियाव बिपिएफ हान्जाया बबे मोनसे राजखान्थि हान्जाजों लोगोआव थागोन बेनि सायाव फैगौ बिटिसि बिसायख'थिनि उनावनो थार बाथ्राखौ फोरमायगोन होन्नानै हाग्रामा महिलारिआ बुङो।
मख'नो गोनांदि, बे मेलआव बाक्सा जिल्ला बिजेपिनि लाइमोन मर्चानि बारग' आफादगिरि रामचरन डेकानि दैदेन्नायाव सा 42 सांग्रां सोद्रोमाफोरा बिपिएफ हान्जायाव हाबफैयो। बेनि अनगायैबो सा 110 बारग' आसुनि मावफारिजों लोगोसे गुबुन गुबुन हान्जा आफादनि गासै सा 178 सुबुंफोरा हाग्रामा महिलारिनि बाहागो लानायाव बिपिएफ हान्जायाव हाबफैयो।
