• Home
  • /
  • BTR
  • /
  • बिटिआर गोरोबथानि गेजेरजों सरकारि जायै फरायसालि-फरायसालिमाफोरा सरकारि जागोनः दिपेन बर’

September 27, 2020

बिटिआर गोरोबथानि गेजेरजों सरकारि जायै फरायसालि-फरायसालिमाफोरा सरकारि जागोनः दिपेन बर’

बरमा, 27 सेप्तेम्बर: बाक्सा जिल्ला दुलाराइ बर' फरायसा आफादनि बान्जायनायाव जिल्लानि सिङाव थानाय बरमा हिन्जावसा गोजौ फरायसालिनि नब्लाङाव शनिबारखालि गुबुन गुबुन फरायसालि–फरायसालिमाफोरनि फोरोंगिरि-फोरोंगिरिजोफोरखौ लानानै दुलाराइ बर' फरायसा आफादआ हालामनि सोलोंथाय थासारिनि सायाव मोनसे गोनांथार सावराय मेल खुंलाङो। बे सावराय मेलाव बाक्सा जिल्लानि सिङाव थानाय बर' बिजोंजों लोगोसे गुबुन गुबुन बिजों जैरै असमीया आरो बेंगली बिजोंनि फरायसालि आरो फरायसालिमाफोरनि जेंनाफोरखौ लानानै गुवारै सावरायनाय जायो। बाक्सा जिल्ला एबसुनि आफादगिरि नृपेन चन्द्र बर'नि मासि सामलायनानै दैदेन्नाय बे मेलाव मिरु दुलाराइ बर' फरायसा आफादनि बारग' बुंथिगिरि बि. सोमखोरा बेसेनगोसा बिबुथिनि गेजेरजों मेलखौ बेखेवनानै होयो। सावराय मेलाव मिरु दुलाराइ बर' फराइसा आफादनि आफादगिरि दिपेन बर'आ बाहागो लानानै गावनि बिबुंथि लाखिनाय समाव बुङोदि, थांनाय 2011 आरो 2017 इं माइथायनि सोलोंथाय दाफामथाय आइननि फरायसालि–फरायसालिमाफोरखौ फैगौ समफोराव बिटिआर गोरोबथानि 6.3 दफायाव मख'नाय बायदियै सरकारि खालामनाय जागोन ।

Dipen Boro Baksa

बिटिआर ओन्सोलनि सोलोंथाय जेंनाजों लोगोसे गुबुन माखासे गेदेर जेंनाखौ लानानै सावरायनाय बे हाबाफारियाव जिल्लानि सिङाव थानाय गुबुन गुबुन फरायसालि आरो फरायसालिमाफोरनि खमैबो सा 400 नि बांसिन फोरोंगिरिफोरा बाहागो लायो। बाहागो लानाय फोरोंगिरिफोरा गोबाव बोसोर सम दान-बान्था गैयाजासे गोब्राब खस्थ'नि गेजेरजों फोरोंथाय होबोनायनि बागै बानबुंथि लाखिनायाव थांनाय 30-35 बोसोरनिफ्रायनो फोरोंगिरि महरै खामानि मावबोनानै दिनैसिम सरकारि खालामजायैखौ लानानै गोथौयै दुखु मोन्नाय फोरमायो। लोगोसे थांनाय 17 बोसोरनि समाव बिपिएफ दैदेन्नाय बिटिसि सरकार थासेयावबो सोलोंथाय बिथिङाव आसुगुर गावगासेबो खामानि मावाखै होन्नानै दुखु मोन्नाय फोरमायो। एबसुनि बे रोखोम सावराय मेल हाबाफारि बान्जायनाय आरो सरकारि नङै फरायसालिफोरखौ सरकारि खालामनो मिजिं होनायनि थाखायबो मेलाव बाहागो लानाय फोरोंगिरिफोरा दुलाराइ बर' फरायसा आफादखौ बाख्नायो आरो साबायखर बाववो। बे सावराय मेलाव मिरु एबसुनि सोलोंथाय नेहाथारि कास्तम बसुमतारि, लोगो सोलोंथाय नेहाथारि अबित नार्जारि, नेहाथारि रोमदोन बसुमतारि, गेलेमु नेहाथारि गनेश बसुमतारि, मावख' नेहाथारि बुदिराम बसुमतारि, बाक्सा, नलबारि, बरपेटा जिल्ला एबसुनि दैदेनगिरिफोर, बारग' एनडिएफबि (पि)नि फोसावदिं नेहाथारि बि. बड'सा, मिरु एबसुनि बारग' बुंथिगिरि कातिनाथ बर'जों लोगोसे ओन्सोलनि गोबां मेलेमजिबिफोराबो बाहागो लादोंमोन।

Share with your friends!

Related Posts

न’खर न’खर हादरारि फिरफिला बिरहोनाय थांखिजों 24BN SSB नि गोलाव हान्जा सुरनाय ।

न’खर न’खर हादरारि फिरफिला बिरहोनाय थांखिजों 24BN SSB नि गोलाव हान्जा सुरनाय ।

बाक्सा जिल्ला एबसुनि बोसोरसालिया जथुम्मा खुंफुंनो रायदाव आफादखौ दाफुंबाय

बाक्सा जिल्ला एबसुनि बोसोरसालिया जथुम्मा खुंफुंनो रायदाव आफादखौ दाफुंबाय

आसामाव जेब्लासिम BJP सोरखार थागोन अब्लासिम फिसा फिसा हारि हारिसाफोरनि मोन्थायफोरा जोबस्रांलांगोन : कास्तम बसुमतारि

आसामाव जेब्लासिम BJP सोरखार थागोन अब्लासिम फिसा फिसा हारि हारिसाफोरनि मोन्थायफोरा जोबस्रांलांगोन : कास्तम बसुमतारि

संका बानदो, जामफैनि दैखौ बानदो थेनानै दै दिखांनो हायैजों जिंगा सिनांदों माखासे आबादारिफोरा

संका बानदो, जामफैनि दैखौ बानदो थेनानै दै दिखांनो हायैजों जिंगा सिनांदों माखासे आबादारिफोरा

Published by

Bodosa


Bodosa is a Daily Newspaper, printed in Bodo language.

Leave Your Comment Here