• Home
  • /
  • BTR
  • /
  • बिटिआर गोरोबथाखौ लानानै दुलाराय बर’ फरायसा आफाद आरो मेलेमजिबिफोरनि गेजेराव सावराय मेल

September 30, 2020

बिटिआर गोरोबथाखौ लानानै दुलाराय बर’ फरायसा आफाद आरो मेलेमजिबिफोरनि गेजेराव सावराय मेल

बिस्वनाथ, 30 सेप्तेम्बरः बिस्वनाथ जिल्ला दुलाराय बर' फरायसा आफादनि बान्जायनायाव जिल्लानि सिङाव थानाय सा 700 निबो बांसिन मेलेमजिबि आरो राइजो-राजाफोरखौ लानानै बिटिआर गोरोबथा आरो बेनि दफाफोरनि सायाव गुवारै सावरायनाय हाबाफारिया मंगलबारखालि जानानै थाङो। जिल्लानि सिङाव गहपुरनि बरफुनि नेसनेल एकाडेमियाव खुंनाय बे सावराय मेलखौ जिल्ला एबसुनि आफादगिरि निजोम बसुमतारिआ मासि सामलायनानै दैदेननो। बे मेलआव मिरु दुलाराय बर' फरायसा आफादनि आफादगिरि दिपेन बर'आ गाहाय आलासि महरै बाहागो लायो। बे सावराय मेलयाव बिटिआर गोरोबथानि दफाबादियै कमिसननि सोद्रोमा महरै थिसनजानाय दुलाराय बर' फरायसा आफादनि लेडाइ आफादगिरि जयन्त बसुमतारिआबो बिबुंथिगिरि महरै बाहागो लादोंमोन। लोगोसे हाबाफारियाव आसाम उरिया युब सात्र परिषदनि गाहाय नेहाथारि पंकच महानन्दआ।

ABSU NEWS from President

गाहाय आलासि महरै बाहागो लानाय एबसुनि आफादगिरि दिपेन बर'आ गावनि बिबुंथियाव बुङोदि, सोलिफु बोसोरनि थांनाय 27 जानुवारी अक्टखालि जानानै थांनाय बिटिआर गोरोबथा बादियैनो गोरोबथायाव मख'नाय 3.1 दफाबादियै कमिसनखौ दानाय जाबाय आरो बे कमिसननि गेजेरजोंनो सनितपुर आरो बिस्वनाथ जिल्लाखौ बिटिआरआव सोसन्नाय जागोन। लोगोसे गोरोबथानि दफा 6.3 आव मख'नाय बादियैबो बावैसो बोसोर सिगां थांनाय 2011 आरो 2017 माइथायनि दाफामथाय आइनयावबो थालांनाय बर' बिजोंनि गुदि, गेजेर आरो गोजौ भेन्सार फरायसालिफोरखौ नायफामनानै सरकारि खालामजोबनो थाखाय सासे मासिगिरि आरो सा 5 सोद्रोमाफोरखौ लानानै मोनसे कमिटिखौ थांनाय 23 सेप्तेम्बर, 2020 अक्टखालि आसाम सरकारआ फोसावयो। थांनाय माखासे सान सिगां बिस्वनाथ ओन्सोलाव माखासे खाबु फलानफोरा बिस्वनाथ जिल्लाखौ बिटिआरआव सोसन्नाय नङा होन्नानै बांसावबाय थानायाव जिल्लानि सिङाव थानाय राइजो-राजाफोरा गिनायजों गोबां गोनो-गोथोयाव गोग्लैदोंमोनब्लाबो मिरु एबसुआ रोखायै बिटिआरआवनो हाबथारगोनखौ खोथा होयो।

दिपेन बर'नि बेबायदि खोथा होनाय आरो बिबुंथि लाखिनायखौ मेलआव नुजाथिनाय गासै मेलेमजिबि आरो राइजो-राजाफोरा गोजोन्नाय फोरमायनायजों लोगोसे एबसुनो साबायखर जासियो। बे सावराय मेलआव मिरु आफादनि लेडाइ आफादगिरि सुनिलाल बसुमतारि, बोसोनगिरि खुंख्रा श्वर्गियारि, सोलोंथाय नेहाथारि कास्तम बसुमतारि, लोगो सोलोंथाय नेहाथारि अबित नार्जारि, गेलेमु नैहाथारि गणेश बसुमतारि, सुबुं फोनांजाब नेहाथारि बिरदाव बर', मावख' नेहाथारि बुदिराम बसुमतारि, मिरु एबसुनि बारग' सुबुं फोनांजाब नेहाथारि बिबिका ब्रह्म, उदालगुरि जिल्ला एबसुनि गेलेमु नेहाथारि मुनसिं ब्रह्म आरो जिल्ला आफादनि गोबां बिबानगिरिफोरा बाहागो लादोंमोन।

Share with your friends!

Related Posts

न’खर न’खर हादरारि फिरफिला बिरहोनाय थांखिजों 24BN SSB नि गोलाव हान्जा सुरनाय ।

न’खर न’खर हादरारि फिरफिला बिरहोनाय थांखिजों 24BN SSB नि गोलाव हान्जा सुरनाय ।

बाक्सा जिल्ला एबसुनि बोसोरसालिया जथुम्मा खुंफुंनो रायदाव आफादखौ दाफुंबाय

बाक्सा जिल्ला एबसुनि बोसोरसालिया जथुम्मा खुंफुंनो रायदाव आफादखौ दाफुंबाय

आसामाव जेब्लासिम BJP सोरखार थागोन अब्लासिम फिसा फिसा हारि हारिसाफोरनि मोन्थायफोरा जोबस्रांलांगोन : कास्तम बसुमतारि

आसामाव जेब्लासिम BJP सोरखार थागोन अब्लासिम फिसा फिसा हारि हारिसाफोरनि मोन्थायफोरा जोबस्रांलांगोन : कास्तम बसुमतारि

संका बानदो, जामफैनि दैखौ बानदो थेनानै दै दिखांनो हायैजों जिंगा सिनांदों माखासे आबादारिफोरा

संका बानदो, जामफैनि दैखौ बानदो थेनानै दै दिखांनो हायैजों जिंगा सिनांदों माखासे आबादारिफोरा

Published by

Bodosa


Bodosa is a Daily Newspaper, printed in Bodo language.

Leave Your Comment Here