बासुगाव, 15 सेप्तेम्बर: कभिड-19 नि थाखाय बिटिसिनि बिसायख'थिआ माब्ला खुंजागोन बेखौ लानानै सम आरो अक्ट फोसावजायाखैब्लाबो गासैबो राजखान्थि दोलो आफादफोरानो फोसावदिंनायाव बांसिननिफ्राय बांसिन बोलो होदों । बेनि गेजेरावनो बिटिसिनि 12 नं सालाकाति बियाबनि बिजेपिनि फसंजानाय बिजाथि कबिता बसुमतारिआ दिनै गंसे शिबलिंग बेखेवनानै होयो। सालाकाति बियाबनि सिङावनो थानाय जरेगावनि बातिपारायाव थानाय शिब मन्दिरनि लांगोना मोखाङाव थांनाय 1 दाननि सिगांनो फसंजानाय गंसे शिबलिंगखौ दिनै बिथाङा बेखेवनानै होयो।
शिबलिंगखौ बेखेवनानै होनायजों लोगोसे कबिता बसुमतारिआ फैगौ बिटिसिनि बिसायख'थियाव देरहासारनो थाखाय आशिर्बादबो लायो। हिन्दु धोरोम आसारखान्थिजों शंक आरो घन्टा दामनानै मन्दिरखौ जौगाखांहोनायनि बाथ्रा होयो कबिता बसुमतारिआ। अदेबानि बिथांजों लोगोसे नुजाथिफानाय सिबियारिफोराबो कबिता बसुमतारिनि देरहासारनांगौनि थाखाय आर'ज गाबो। मिरु आरो राइज्योआवबो बिजेपि सरकार थानायलाय बिटिसिआवबो बे खेबआव बिजेपि दोलोआनो सरकार दागोन होन्नानै मख'ना गाहाय थाखोनि साफ्रोमबो मावथिफोरानो जर होयोब्ला गावनि देरहासारनाया रोखा होन्नानै दाबियो कबिता बसमतारिआ।
अदेबानि सा 5 बिजाथिफोरनि गेजेराव हाग्रामा महिलारि दैदेन्नाय बिपिएफ दोलोनि बिजाथि देरहासार बसमतारि आरो प्रमद बर' दैदेन्नाय इउपिपिएल दोलोनि लाजु मोसाहारिआबो फोसावदिंनायाव उन जानानै थायाखै। बेखायनो 12 नं सालाकाति बियाबआव बबे मोनसे राजखान्थि दोलोनि फसंजानाय बिजाथिया देरहासारनो हागोन बेखौ बुनाया गोब्राब आरो बिसायख'थिनि उनावसो बेनि रोखा सावगारिआ नुजाथिगोन होन्नानै गोबाङानो बुंसोलायदों।
