मुसलपुर, 14 सेप्तेम्बरः बिटिसिनि फैगौ 4 थि बिसायख'थिखौ लानानै गुबुन गुबुन राजखान्थि हान्जानि फोसावदिंनाय आरो मेल-मिथिं खुंनाया दासान्दि ओन्सोलनि बारहावाखौ दुंहाव खालामबाय थानायखौ नुनो मोन्नाय जादों। 25 नं बागानपारा बियाबनि सिङाव थानाय सुबनखाथायाव रबिबारखालि बिपिएफ हान्जानि मोनसे बिसायखथियारि मेल खंनाय जायो।
सुबनखाथा प्राइमारि बिपिएफनि आफादगिरि अबिर तामांनि मासि सामलायनायाव खुंनाय बिपिएफ हान्जानि बिसायख'थि मेलाव ओन्सोलनि गासै गं 70 गामिनि आफादगिरि, नेहाथारि आरो ओन्सोलनि सान्नो हनो गोरों सुबुंफोरा बाहागो लानाय मेलाव बागानपारा बियाबनि बिपिएफ हान्जानि बिजाथि थामहिनबा बारग' एमसिएलए फलिन्द्र बसुमतारिया बाहागो लानानै बुङोदि, बिटिसिनि फैगौ 4 थि बिसायखथियावबो बिपिएफ हान्जायानो फिन देरहानानै बिटिसि खुंथायखौ दखल खालामगोन।
25 नं बागानपारा बियाबयाव बिपिएफ हान्जायानो बांसिन भट लानानै देरहासार जागोन होन्नानै बिजाथिया दाबि खालामो। गावनि बिबुंथियाव फलिन्द्रआ बुङोदि, फैगौ सरकारनि समाव जिल्लानि भारत-भुटान सिमनानि गेजेराव थानाय गामिफोराव लोंग्रा दैनि जेंनाखौ नोजोर बोनानै ओन्सोलनि गंफ्रोम गामियाव लोंग्रा दैनि जेंनाखौ बोस्रांनो थाखाय गोनांथारै नाजानाय जागोन।
