मुसलपुर, 27 सेप्तेम्बर: बागसा पुलिसनि मोनसे जाफुंसार सिग्रोमनाय। बागसा जिल्लायाव फिन आइन बेरेखा हाथियार बोखांनो हाबावदों। जिल्लानि बरबरि पुलिस थानानि सिङाव थानाय सिनारि बस्टियाव शनिबारखालि बागसा जिल्ला पुलिसआ मोनसे सिग्रोमनाय हाबाफारि बान्जायनायनि गेजेरजों गोबां बिबांनि हाथियारजों लोगोसे बेरफुग्रा मुवा बोखांनो हानाय जाथाया जिल्ला नाङैनो सोमोनांहोदों। बागसा पुलिसनि एडिसनेल एसपि लामहाउ दंगलनि दैदेन्नायाव आरो बरबरि थानानि असिनि नाजानायाव बे हाथियारखौ बोखांनो हायो होन्ना बागसा जिल्लानि एसपि हिरन्य बर्मनआ मोनसे खौरांगिरि मेलनि गेजेरजों मिथिहोदों ।
बबेखानि बिथाङा फोरमायनाय बायदिब्ला बे हाथियारखौ दिरिं दैमानि रुगुङाव फबनानै दोन्नायनिफ्राय बोखांनो मोन्नाय जादों होन्नानै फोरमायना थारैनो बे फबनानै दोन्नाय हाथियारफोरा सोरनि बेखौ मिथिनो मोन्नाय जायाखैब्लाबो बेनि सायाव संदान्नाया सोलिगासिनो दं होन्नानै बिथाङा खौरांगिरिनि सिगाडाव फोरमायथियो। बोखांनो मोन्नाय हाथियारफोरनि गेजेराव दं गंनै एके 47 राइफलस, गं 4 मेगजिनजों लोगोसे गर 520 गोथां गुलि दङ।
