बाकसा, 12 सेप्तेम्बर : बाकसा जिल्लानि भारत-भुटान सिमनायाव सोलिगासिनो दं मैदेर आरो मानसिनि गेजेराव दावहा। सानफ्रोमबो हाग्रानि मैदेरा सिमना ओनसोलनि भुटानखुटियाव हाबनानै जानला मानला सिलिंखार खालामनायनि जाहोनाव ओनसोलनि राइजोफोरनि गेजेराव उन्दुनाय गैयै जादों।
मखथावनादि भुटान हाजोनिफ्राय हायेन फारसे आदार नागिरनानै ओंखारबोनाय फालोसे हाग्रानि मैदेरा सानफ्रोमबो गामियाव हाबनानै गोबां नखरनि गय बारिखौ थेर बेथेर खालादों। थिक बेबादिने बृहस्पतिबारखालिबो भुटान हाजोनिफ्राय ओंखारबोनाय मा 40 सो हाग्रानि मैदेरा भुटानखुटि गामिनि गं ब्रै नखर फारियै भद्र गयारी, रेखा बराल, माधब अधिरारिनि बाङायैबो 200 सो गय बिफांखौ फुनानै खहा खालामो।
मखथावनादि गामिनि राइजोफोरा हर जाब्लानो लामायाव ओंखारनानै अर लगायना मैदेर होनायनि राहा खालामदोंब्लाबो हाग्रा बिफाना मैदेर होनो थाखाय जेबो राहा लायैनि अजद सिखारदों। अजद सिखारनाय बादिब्ला हाग्रा बिफाना मैदेर होनायनि मुङाव पेकेटब्रै पेकेटबासो बमा राननानै होनानैनो गावसोरनि मावनां बिबानखौ फोजोबदों।जायनि जाहोनाव ओनसोलनि राइजोफोरा जिउ आरो दोहोननि रैखाथि नागिरनानै गोदाव सोराव जानो गोनां जादों।
