बर’ खुगा मेथाइनि देंखोगिरि लादुरा नार्जारिआ फाहामथाय लानायाव रांखान्थिनि जेंनाजों मोगा-मोगि जानांदों

गसाइगाव, 10 अक्टबर: बर' खुगा मेथाइनि मिबथिसार जानाय गुबुन सासे रोजाबगिरि एबा खनगिरि लादुरा नार्जारिआ थांनाय माखासे साननिफ्रायनो देहानि गोब्राब जेंनायाव गोग्लैनानै दङ। बर' खुगा मेथाइयाव राइजो-राजाफोरनि गेजेराव मिबथिसार जानाय लादुरा नार्जारिआ गावनि नाजाथाबनायनि गेजेरजों बर' हारिमुनि खुगा मेथाइनि आयदायाव गोबां मेथाइफोर रोजाबलांदोंमोन। दिनै बि देंखोगिरिआ थांनाय 7 बोसोरनिफ्रायनो गोबां खैदां-खैफोदनि गेजेरजों जिउखौ दैदेन्नो गोनां जादोंमोनब्लाबो मोनसेबो हान्जा, आफादफोरा बिथांनि देहा हालोदनि सायाव खौरां लानाय नुनो मोनाखै होन्नानै अजद सिखारदों। थांनाय समफोराव नख'रनि रांखान्थि लोरबां हालोदनि गेजेरावबो लादुरा नार्जारिआ गोबां बर' खुगा मेथाइजों लोगोसे गुबुन गुबुन रोखोमनि मेथाइफोरखौ रोजाब बोनानै बर' खुगा मेथाइनि बाख्रिआव बिहोमा होबोदोंमोन आरो सासे गागि देंखोगिरि महरै गावखौनो सिनायथि होनो हादोंमोन ।

     कक्राझार जिल्लानि गसाइगाव महकुमानि सिङाव थानाय बारकामबिल गामियाव 1952 माइथायाव जोनोम मोन्नाय लादुरा नार्जारिआ 17 बोसोर बैसोनिफ्रायनो गावनि नाजानायजों बर' खुगा मेथाइफोर रोजाबबोदोंमोन । माखासे बर' मेथाइखौ बिथाङा केसेट महरैबो दिहुन्नो हादोंमोन आरो गावनि लिरनाय आरो सुजुनायावनो बर' खुगा मेथाइखौ सुबुंफोरनि गेजेराव दिन्थिफुंनो हादोंमोन। जौसेनिबो बांसिन मेथाइ सुजुनाय आरो देंखो रोजाबनाय लादुरा नार्जारिआ दुलाराय बर' हारिमु आफादनि आफाद फसंनाय समनिफ्रायनो बर'जों लोगोसे गवालपारीया आरो असमीया मेथाइफोरबो रोजाबनानै खोनासंग्रा सुबुंफोरनि गोसोखौ जै खालामनो हादोंमोन। समाज आरो हारिमु बिथिङाव नांथाबनायनि थाखाय बिथांखौ बर' थुनलाइ आफाद, असम साहित्य सभा, फरायसा आफादनि जौसाङाव गेवलां बरायजानायजों लोगोसे गसाइगाव महकुमा खुंथायनिफ्रायबो गनायथि लाइ मोन्नो हादोंमोन।

मख'नो गोनांदि, हारिमु आयदायाव सासे गागि देंखोगिरि महरै गावखौनो सिनायथि होनो हानाय लादुरा नार्जारिआ सरकारि बिथिंनिफ्राय देंखोगिरिफोरनो होनाय रांखान्थि हेफाजाब पेन्सननि थाखायबो नैथि खेब आर'जलाइ जमा होनायनि उनावबो नाथाय बे खाबुखौ मोन्नो हायाखैमोन। नैथि खेब देंखोगिरि पेन्सननि थाखाय आर'जलाइ थिसन्नाय जादोंब्लाबो रावनिबो हेफाजाब मोनैयाव दासान्दि देहानि रुइलांनायाव देहायारि जेंनाजों मोगा-मोगि जानांदों लादुरा नार्जारिआ। नार्जारिआ फारफ्रोमथिंजायनिफ्रायबो रांखान्थि हालोदजों लोरबां जानायाव गावनि फाहामथाय लानायनि फार्से गोब्राब जेंनाजों मोगा-मोगि जानांदों। मख'नो गोनांदि, जाय समाव आसामनि गासै देंखोगिरिफोरनि मुङाव रांखान्थि हेफाजाब होबोनाय जादों बेबादि समावनो बर' हारिनि गुबुन सासे गागि मिबथिजानाय देंखोगिरिआ रांखान्थिनि लोरबां हालोदजों मोगा-मोगि जानांनानै दासान्दि गोबां खस्थ'नि गेजेरजों जिउखौ दैदेन्नो गोनां जादों । फार्सेथिं देंखोगिरिनि देहा हालोदनि सायाव खुंथायनि सासेबो खौरां लाहैयाखै होन्नानैबो अजद सिखारदों।