• Home
  • /
  • Regional
  • /
  • बड’लेन्ड टेरिटरियेल रिजननि रादाय बादियै आसाम केबिनेटआ बर’-कसारि वेलफेयार अट’नमास काउन्सिल आरो बर’ रावखौ राइज्योनि सरकारि लोगो राव महरै बिल पास खालामबाय

October 8, 2020

बड’लेन्ड टेरिटरियेल रिजननि रादाय बादियै आसाम केबिनेटआ बर’-कसारि वेलफेयार अट’नमास काउन्सिल आरो बर’ रावखौ राइज्योनि सरकारि लोगो राव महरै बिल पास खालामबाय

दिसपुर, 8 आक्ट'बरः आसामनि गिबि मन्थ्रि सर्बानन्द सनवाल आरो रांखान्थि बिफाननि मन्थ्रि हिमन्त बिश्व शर्माया बावैसो साननि सिगां गोदान दिल्लीयाव हरखाब दावबायलांनानै मिरुनि नख'र मन्थ्रिजों बिटिआर गोरोबथानि दफाफोरखौ मावफुंनायनि सोमोन्दै गोथौवै सावरायहैनायनि उनाव बर'फोरनि जारिमिनारि बिटिआर गोरोबथानि दफाफोरखौ दान मोनसेनि गेजेरावनो मावफुंनो बिथोन होनाय बायदियै बुधबारखालि मोन्नै गोनां आयदाफोरखौ आसाम केबिनेटआव गनायथिनाय जायो। गुवाहाटी नोगोरमानि खानापारायाव थानाय आसाम एडमिनिस्ट्रेटिभ स्टाफ फरायसालिमायाव राइज्यो सरकारनि मोनसे गोनांथार केबिनेट जथुम खुंनाय जालाङो।

गिबि मन्थ्रि सर्बानन्द सनवालनि मासि सामलायनायाव खुंनाय बे केबिनेट मेलआव राइज्योनि माखासे आयदाफोरखौ आजावनानै लानायजों लोगोसे जारिमिनारि बर’फोरनि बिटिआर गोरोबथानि माखासे दफाफोरखौ मावफुंनायनि थाखाय गनायथिनाय जायो। गिबि मन्थ्रिनि सामलायनायाव खुंनाय बे केबिनेटनि जथुमाव गुवारै सावरायनानै थांखि लानाय आरो गनायथिनाय आयदाफोरनि सायाव सावरायनाया जोबनायनि उनाव मन्थ्रि चन्द्र महन पातवारिया खौरां बिजोंनि सिगाङाव केबिनेट जथुमनि गेजेरजों थांखि लानाय आरो बिल गनायथिनाय आयदाखौ फोसावनानै होयो। केबिनेटआ गनायथिनाय बिलफोरा जादों- बिटिआरनि बिसायख'थिखौ फैगौ डिसेम्बर दाननि गेजेराव खुंनो थाखाय राइज्यो बिसायख'थि आयगखौ खावलायनो थिरांथा लानाय जायो। 

बे मन्थ्रि आफादनि जथुम्मायाव 6 थि फारिलाइनि ओन्सोलनि बाइजोयाव थानाय बर' सुबुं मैखोम गामिफोरखौ लाफानानै बर'-कसारि वेलफेयार अट'नमास काउन्सिल दाफुंनायनि बिलखौ केबिनेट जथुमनायावनो बिल गनायथिनाय फोसावयो। बुधबारखालि खुंनाय मन्थ्रि आफादनि बे जथुमनायावनो बर' रावखौ राइज्योनि लोगो सरकारि राव महरै गनायथिनाय जायो। मन्थ्रि आफादनि जथुमनायाव बिटिआर ओन्सोलनि बिबानगिरिफोरखौ ओन्सोलनि साइन बर्डफोराव मुं बाहायनायाव बर' आरो इंराजी रावजों लोगोसे असमीया रावखौबो बाहायनायनि राहा लानो थांखि लानाय जायो।

Assam Cabinet Meen

मख'नो गोनांदि, गिबि मन्थ्रि मासि सामलायनायाव खुंनाय मन्थ्रि आफादनि बे गोनांथार जथुमनायाव बिटिआर गोरोबथानि माखासे दफाखौ आसाम सरकारा मावफुंनो बिल गनायथिनायखौ माखासे बर' आफादफोरा गोजोन्नाय, बरायनाय फोरमायनायजों लोगोसे सरकारनि बेबायदि थांखि लानायखौ गोसो गोजोन्नाय फोरमायदों। मख'नो गोनांदि, गिबि मन्थ्रि सर्बानन्द सनवाल, मिरुनि नख'र मन्थ्रि अमित शाह आरो दुलाराइ बर' फरायसा आफाद (एबसु), नेसनेल डेमक्रेटिक फ्रन्ट अफ बर'लेन्ड (एनडिएफबिनि मोनब्रै हान्जा), इउनाइटेड बड' पिपुल्स अर्गेनाइजेसन (इउबिपिअ)नि दैदेनगिरिफोरनि गेजेराव जारिमिनारि 3 थि बर' गोजोन गोरोबथाया जादोंमोन। बे गोरोबथानि गेजेरजों बर'फोरा जारिमिनारि बिटिआरजों लोगोसे बर'-कसारि वेलफेयार अटनमास काउन्सिल आरो गोबांथार फसंथानफोरखौ मोन्नो हादों । बे गोरोबथानि दफाफोरखौ फारि-फारियै आसाम सरकार आरो भारत सरकारा बिबान लानानै मावफुंनो जागायजेन्नाया बर’फोरनि थाखाय जोबोद फिथाइ गोनां जादों। बेजों लोगोसे मन्थ्रि आफादनि सावरायनायाव थांखि लानाय जादोंदि, आसाम सरकारनि गुबुन गुबुन बिफाननि थिसन्थायनि जायखि-जाया आन्जादयावनो गावआरि फसंथानखौ थिसनैनि थांखि लानाय जायो। बे बिथिङाव बिफानफोरा राइज्योयारि एबा मिरु मुलुगसोलोंसालिनि गेजेरजों बे थिसन्थायनि आन्जादफोरखौ खुंनो हागोन।

बे जथुमाव मन्थ्रि आफादआ साहा बागान बिबानगिरिनि गेजेरजों सामलायजानाय गं 428 फरायसालिनि फरायसुला फरायसुलिफोरनि थाखाय डे बर्डिं आरो बेसेन नाङै गानग्रा जोमग्रा जगायनो थांखि लानाय जायो। जथुमनायाव राइज्योनि जौगाखां परिषदनि सोद्रोमानि अन्जिमाखौ बाङाइबो 25 निफ्राय बांसिनै 45 सिम बारायनायनि गनायथिनाय जादों । बे मन्थ्रि आफादनि जथुमनायावनो माजुलियाव हाग्रा बिफाननि मोन्नै गोदान रेन्ज आरो मोन 4 बिट अफिस फसनायनि थांखि लायो। सावरायनायाव गावबुराफोरनि दान-बान्थाखौ 6,500 रांनिफ्राय 9,000 रांसिम बारायनायनि थांखि लायो। बेजों लोगोसे बे जथुमनायावनो आसाम लकसेवा आयगनि गेजेरजों खुंनाय जुथाय सिभिल सार्भिसनि आन्जादयाव असमीया, बाङाली आरो बर' रावनि बिजोङाव सोलोंथाय लायै बराक हायेननि फरायसुला फरायसुलिफोरखौ रावनि गोनांथारै आन्जादयाव उथ्रिसारनो हानायनिफ्राय रेहाय होनायनि थांखि लादों।

बेनि अनगायैबो आसाम टि प्लेन्टेसन प्रभिडेन्ट फान्ड स्किमनि सिङाव दासान्दि 1 लाख रांनिफ्राय 2 लाख रांसिम बारायनायनि थाखाय मन्थ्रि आफादनि जथुमनायाव थांखि लायो। मन्थ्रि आफादनि जथुमनायाव कनकलता आइजो जौगाखां होनाय बिथांखिनि सिङाव जाथावना आइजो सेल्फ-हेल्प ग्रुपफोरनो 50 रोजा रांनि हेफाजाब होनोबो थांखि लानाय जायो। बे जथुमनायावनो आसाम लकसेवा आयगआव आइजो सोद्रोमानि अन्जिमानि बिथिङाव थानाय आयगनि नेमखान्थिखौ सोदांफिन्नायनि गनायथिनाय जायो। बेजों लोगोसे मन्थ्रि आफादआ सा 4,534 अरायथा नङै फोरोंगिरिफोरखौ साख्रियाव थिसन्नायनि थांखि लादों। आमिनगावयाव माहारियारि ना जौगाखां गौथुमनि दालाइ मिरु फसंनायनि थाखाय 30 बिघा सरकारि हा सायख'ना लानायनि थांखि लादों। बेबायदिनो माखासे आयदानि सायावबो बे मन्थ्रि आफादनि सावरायनायाव गोनांथारै थांखि लानाय जायो।

Share with your friends!

Related Posts

आसामाव जेब्लासिम BJP सोरखार थागोन अब्लासिम फिसा फिसा हारि हारिसाफोरनि मोन्थायफोरा जोबस्रांलांगोन : कास्तम बसुमतारि

आसामाव जेब्लासिम BJP सोरखार थागोन अब्लासिम फिसा फिसा हारि हारिसाफोरनि मोन्थायफोरा जोबस्रांलांगोन : कास्तम बसुमतारि

संका बानदो, जामफैनि दैखौ बानदो थेनानै दै दिखांनो हायैजों जिंगा सिनांदों माखासे आबादारिफोरा

संका बानदो, जामफैनि दैखौ बानदो थेनानै दै दिखांनो हायैजों जिंगा सिनांदों माखासे आबादारिफोरा

11 मेनिफ्राय मेट्रिक आन्जादखौ खुंनो फोसावबाय

11 मेनिफ्राय मेट्रिक आन्जादखौ खुंनो फोसावबाय

तिवा गावखुंथाय गौथमनि गाहाय मावफुंगिरि महरै जिबन चन्द्र कुवँरआ समायखिरा लाबाय

तिवा गावखुंथाय गौथमनि गाहाय मावफुंगिरि महरै जिबन चन्द्र कुवँरआ समायखिरा लाबाय

Published by

Bodosa


Bodosa is a Daily Newspaper, printed in Bodo language.

Leave Your Comment Here