कक्राझार, 11 सेप्तेम्बरः बि टि सिनि आरो आफां आसामनि मोनसेल’ मुलुगसोलोंसालि बडलेण्ड मुलुगसोलोंसालिनि फरायसाफोरा दिनैबो सोमावसारदों। कभिड-19नि गिख्रंथाव थासारिनि गेजेरावनो समाजारि जान्थायखौ रैखा खालामनानै आरो खुगायाव मास्क गाननानै सोमावसारनायाव बाहागो लादों फरायसाफोरा। थाबैनो बि एडनि 4थि एबा जोबथा सेमिस्तारनि आनजाद खुंनायनि दाबिजों सोमावसारदों भुगिनांनाय फरायसाफोरा। 30 सेप्तेम्बरनि गेजेराव आनजादनि फिथायखौ मोननायबादि बि एडनि जोबथा आनजादखौ खुंनायनि दाबि दैखांनानै सोमावसारना फरायसाफोरनि जउखौ लानानै गेलेनायनि अजद दैखाङो।
टेट उथ्रिसारजानाय 100 निबो बांसिन बि एड फरायसाफोरनि जोबथा आनजाद खुंनायनि थांखि लानाय गुबुन गुबुन मुलुगसोलोंसालि जेरै- तेजपुर मुलुगसोलोंसालि, गुवाहाटी मुलुगसोलोंसालिफोराव आनजाद खुंनो दासान्दि थांखि आजावना लादों। नाथाय बड’लेण्ड मुलुगसोलोंसालियाव रोखोमसे आनजादखौनो खुंनो भि चिखौ लोगो हमनानै दाबि दैखांबोबाय थानायनि उनावबो आयदाखौ बांद्राय गोसो होयाखै होननानै अजद दैखांदों फरायसाफोरा।
जुदि बि एडनि जोबथा आनजादनि फिथायखौ 30 सेप्तेम्बरनि गेजेराव मोननायबादि खुंनानै होया अब्ला फैनो गोनां गोजौ फरायसालिनि टेट फोरोंगिरिनि खाबुखौ मोननाय नङा, मानोना दा राज्योनि सोलोंथाय मन्थ्रि ड0 हिमन्त बिश्व शर्माया फोसावना होदोंदि फौगौ सेप्तेम्बरनि नैथि सप्ताहयाव गोजौ फरायसालिनि फोरोंगिरि थिसननायनि हाबाफारि लानाय जादों। बेनिखायनो फोरोंगिरि जानायनि सिमांगौ मोगथां महर होनो हानाय बादियै फरायसाफोरनि दाबिफोरखौ सुफुंनानै होनो दाबि दैखाङो बि एडनि फरायसाफोरा।
बेराफारसेथिं बड’लेण्ड मुलुगसोलोंसालिनि भि चि प्रफेसर लाइश्राम लाडुसिंआ फोरमायनाय बादिब्ला कभिड-19नि थाखाय 30 सेप्तेम्बरसिम फरायसालि फसंथानआ बन्ध लाखिनायनि बिथोनलाइ दङखायनो आनजाद खुंनो हाथावना नङा। बेनिथाखाय भुगिनांनाय फरायसाफोरा राज्योनि सोलोंथाय मन्थ्रिनि खाथियाव आनजाद खुंनायनो आरज गाबोब्ला मोजां जागोन, मानोना सरकार आरो खुंथाया होनाय बिथोनखौ नेवसिगारनो हाया।
