• Home
  • /
  • Sports
  • /
  • बक्सार सारिता देबिनि देहायाव करना पजिटिभ

August 19, 2020

बक्सार सारिता देबिनि देहायाव करना पजिटिभ

गोदान दिल्ली, 18 आगस्ट: बारग' वर्ल्ड सेम्पियन जानाय गोहो गोरा आइजो बक्सिं गेलेगिरि सारिता देबिनि देहायाव करना पजिटिभ केसखौ मोन्नो हादों । समबारखालि सारिता देबिनि देहायाव करना टेस्ट खालामनायनि उनावनो पजिटिभखौ मोन्दों । दासान्दि सारिता देबिखौ फाहामथायनि थाखाय फाहामसालिआव थिसन्नाय जादों। मख'नो गोनांदि, सारिता देबिनि देहायाव करना भाइरासनि सन्देरनाय जेबो लैखोनखौ नुनो मोनाखै। नाथाय बेनि गेजेरावबो बक्सार गेलेगिरि आइजोनि देहायाव टेस्ट खालामनायनि गेजेरजों पजिटिभ केसखौ मोन्नो हायो आरो बेनि फिसाइ तैयबा सिंनि देहायावबो पजिटिभ केसखौ मोन्नो हादों। सारितानि बादि फिसाइनि देहायावबो करनानि जेबो लैखोनखौ मोन्नो हायाखैमोन। बेनि सोमोन्दै फिसाइ तैयबाआ बुडोदि, आं आरो सारिता देबिनि देहायाव पजिटिभ केसखौ मोन्नो हादों। जों इम्फलआव थानाय कभिड केयार सेन्टारआव थागोन होन्नानै मिबथिहोदों। फिसाइआ बुंबावोदि, करना भाइरासजों सन्देर जादोंब्लाबो जों बेनि सायाव जेबो जिंगासिनाय फैयाखै । गुबुन फार्सेथिं सारिता देबिनि फिसाज्लानि देहायाव करना टेस्ट खालामनायाव नेगेटिभ रिपर्टखौ मोन्नो हादों। सारिता देबिआ दासिम हादरनि जानानै गेलेनायाव बाथि खेब एसियान सेम्पियनसिपआव सनानि मेडेलखौ देरहानो हानायनि अनगायैबो एसियान गेम्सआव ब्रन्जनि मेडेलखौ देरहानो हादों। मख'नो गोनांदि, 38 बोसोर बैसोनि बक्सार डिक' सिंनि उनाव करना भाइरासजों सन्देरजानाय सारिता देबिआ हादरनि नैथि गेलेगिरि जादों । सारिता देबिआ गोलाव सम हादरनि जानानै गेलेहोनायाव दासिम गोबां देरहानानै हादरनि गेजेराव गुबुन सासे मख'जाथावना गेलेगिरि जानानै दजङ आरो दासिमबो गावनि गेलेनायखौ सम सम बक्सिंनि रिंगआव सोलिहोबाय थादों। सारिता देबि आरो बिनि फिसाइआ बुडोदि बे समाव जोंनि थाखाय खैफोद गोनां जादोंब्लाबो नाथाय जों सानैजों खौसेयै जुजिनानै देरहागोन होन्नानै सुलुङाव फोरमायदों।

Share with your friends!

Related Posts

आसाम इयुथ अलिम्पिक 2022 आव तामुलपुरनि गेलेगिरिफोरा मोननै सना आरो मोननै रुफानि मेडेल दारहासारदों

आसाम इयुथ अलिम्पिक 2022 आव तामुलपुरनि गेलेगिरिफोरा मोननै सना आरो मोननै रुफानि मेडेल दारहासारदों

रनाल्डनि गलआ बेकार: सिरि-एआव भेरोनाया जुभेन्टासजों ड्र लाखियो, प्रिमियार लीगआव मेनसिटिआ लान्थ्रियैनो 20 थि मेच देरहादों

रनाल्डनि गलआ बेकार: सिरि-एआव भेरोनाया जुभेन्टासजों ड्र लाखियो, प्रिमियार लीगआव मेनसिटिआ लान्थ्रियैनो 20 थि मेच देरहादों

आगु वर्ल्ड सेम्पियनखौ फेजेन्नानै रेसलिंआव सना मेडेल देरहाबाय भिनेश फगातआ

आगु वर्ल्ड सेम्पियनखौ फेजेन्नानै रेसलिंआव सना मेडेल देरहाबाय भिनेश फगातआ

भारतनि हान्जाया जोबथा मेचयाव मुलुगनि नैथि हान्जा आर्जेन्टिनानि हेथायै ड्र गेलेदों

भारतनि हान्जाया जोबथा मेचयाव मुलुगनि नैथि हान्जा आर्जेन्टिनानि हेथायै ड्र गेलेदों

Published by

Bodosa


Bodosa is a Daily Newspaper, printed in Bodo language.

Leave Your Comment Here