कक्राझार, 19 अक्ट'बर: राइज्योयारि बिसायख'थि आयगआ दासिम बिसायख'थि खुंनायनि अक्ट'खौ फोसावनाय जायाखैब्लाबो नाथाय बि टि आर बिसायख'थिखौ गाहाय थांखि लानानै दासान्दि गुबुन गुबुन राजखान्थि दोलोफोरनि गेजेराव बिसायख'थि फोसावदिनाया गोख्रोंनिफ्राय गोख्रोंसिन जानायखौ नुनो मोन्दों। गुबुन गुबुन राजखान्थि दोलोफोरनि थांखिया मोनसेल' बेनो जादों, बिटिआर बिसायख'थिखौ जेरैखि-जाया देरहानानै खुंथायाव फैनाय। बेनि गेजेरावनो गुबुन गुबुन राजखान्थि हान्जाफोरनि फैगौ बिसायख'थियाव मासि देरहागोननि दाबिदार खालामना लानायखौ दासान्दि मेल-मिथिं खुंनाय आरो बिसायख'थि फोसावदिंनाय समाव राजखान्थिगिरिफोरनि खुगानिफ्राय खोनानो मोन्दों । मख'नो गोनांदि, बि टि सि खुंथायाव 17 बोसोर थाबोनाय हाग्रामा महिलारिनि दैदेन्नाय बि पि एफ दोलोआ 4 थि खेब खुंथायखौ दख’लाव लाफिन्नो सोलो-बोलोजों गोबां नाजाथाबनायखौ नुनो मोन्दों। फारसेथिं प्रमद बर'नि दैदेन्नाय इउ पि पि एल दोलोआबो बे बिथिङाव उनफिन्नानै थायाखै।
बबेखानि दासान्दि दोलोनि फोसावदिंनायखौ बि टि आरनि मोनब्रै जिल्लायाव फारियै सोलिहोबाय थानायखौ नुनो मोन्दों। एरैहाय नैथि खेब कक्राझार लक सभा बियाबनिफ्राय बिसायख'जानाय एम पि हिरा शरनियानि दैदेन्नाय गन' सुरक्षा पार्टीयाबो दरब्रै जिल्लानि सिङाव दोलोनि फसंनाय बिजाथिफोरनि थाखाय फोसावदिंनायाव मुखुब जानायखौबो नुनो मोन्दों । बेबायदिनो गुबुन राजखान्थि दोलो कंग्रेस, ए आइ इउ डि एफ आरो माखासे राजखान्थि दोलोनि फोसावदिंनायाबो ओन्सोलाव सोलिबाय थादों।
मख'नो गोनांदि, बि टि आरनि थिखानाय मोन 40 परिषद बियाबनि गेजेराव प्रमद बर'नि दैदेन्नाय इउ पि पि एल दोलोआ गाव हारसिङै बिसायख'थि गेलेनो थांखिजों गासैबो बियाबफोरावनो बिजाथि फसंनाय जादों। बेबायदिनो बि पि एफ दोलोआबो मोन 40 बियाबफोरनि गेजेराव सा 37 बिजाथिफोरखौ फसंनाय जादों। फारसेथिं गन' सुरक्षा पार्टीयाबो मोन 40 बियाबफोरनि गेजेराव सा 35 बिजाथिफोरखौ फसंदों। बेनि अनगायैबो ए आइ इउ डि एफआ सा 7, कंग्रेसया सा 13 बिजाथिफोरखौ गुबुन गुबुन बियाबफोराव फसंनाय जादों।
अदेबानि गोजौयाव मख'नाय बैफोर राजखान्थि हान्जानि बिजाथिफोरखौ देरहाहोनाय एबा सायख'नाया ओन्सोलनि राइजो-राजाफोरनि आखायावसो दं। जायनि थाखाय दासान्दि बि टि आर ओन्सोलनि मोन 40 बियाबफोराव गुबुन गुबुन राजखान्थि दोलोफोरा थाद'नाय गैयाजासे मेल-मिथिं खुंनाय आरो फोसावदिंनायखौ सोलिहोबाय थानायजों सुबुंफोरनि भटखौ मा राहाजों आदाय खालामनो एबा मोन्नो हायो बेनि फारसे गुबुन गुबुन बाथ्राफोरजों फुस्लायनाय आरो बाथ्रा होनायफोरखौबो राजखान्थिगिरिनि खुगानिफ्राय खोनानो मोन्दों।
रायखांनो गोनांदि, थांनाय माखासे दाननि सिगां राइज्यो सरकार आरो मिरु सरकारजों जारिमिनारि बर' गोजोन गोरोबथा बायदियै बि टि आरखौ अन्थोब महरै मोन्नो हानायजों बे बि टि आर गोरोबथानि दफाफोरखौ मोगथां महराव जाफुंसार होनो थांखिजों आथिखालनि इउ पि पि एल दोलोनि आफादगिरि प्रमद बर'आ हान्जानि थाखाय हर-सान बिसायख'थि फोसावदिंनायखौ सुबुंफोरनि गेजेराव सोलिहोबाय थादों ।
राजखान्थि दोलोफोरा दासान्दि खुंनाय बिसायख'थि फोसावदिनाय आरो मेल-मिथिंनि गेजेराव खायसे मिथिसार जानाय सुबु एबा फावखुंगुरफोरखौ मैखोमै बाहायनायखौबो नुनो मोन्दों । प्रमद बर'नि दैदेन्नाय इउ पि पि एल दोलोआ फोसावदिंनाय हाबाफारिखौ सोलिहोबाय थानायनि गेजेराव दासान्दि बारग' राइज्यो सभानि एम पि आरो दोलोनि गागि दैदेनगिरि उर्खाव गोरा ब्रह्मनि बाहागो लानायखौबो नुनो मोन्दों।
थांनाय माखासे दाननिफ्रायनो बिसायख'थि फोसावदिंनाय हाबाफारिखौ लाबोनो हानायनि गेजेरजों आरो बेनि मोन्दांथिखौ नोजोर होनानै इउ पि पि एल दोलोआ फैगौ बि टि आर बिसायख’थियाव सुबुंफोरनि सोलायनाय लुबैनाय आरो जौगाखांनि सार्थयाव आबुं भटनि हेफाजाबखौ मोन्नानै खुंथायाव फैगोनखौ दाबिदार खालामदों। रबिबारखालि फकिराग्राम बियाबयाव इउ पि पि एल दोलोनि बिजाथि मातिउर रहमानआ बुङोदि, इउ पि पि एल दोलोआ फैगौ बि टि आर बिसायख'थियाव बाहागो लानो मैखोमै साखा-फारा जाबाय।
बियाबनि सिङाव थानाय राइजो-राजाफोरनि फोथायजाथाव भटखौ मोन्नो हानानै गावनि देरहागोनखौबो दाबिदार खालामो बिजाथि रहमानआ। बेबायदिनो मैया 10 नं देबरगाव बियाबनि बिजाथि एबा बि पि एफ दोलोनि आफादगिरि हाग्रामा महिलारिनि थाखाय जिल्लानि सिङाव थानाय जाइनारिनि गेलेग्रा फोथाराव खुंनाय मोनसे फोसावदिंनाय मेलआव दोलोनि नेहाथारि अन्जलि दैमारिया बाहागो लाफैनानै सुबुंफोरखौ थुलुंगाखां होनानै हान्जाखौ आरोबाव गोख्रोंसिन खालामफैदों। अन्जलि दैमारिया गावनि बिबुंथियाव दाबि खालामनाय बायदिब्ला बि पि एफनि आफादगिरि हाग्रामा महिलारिया गावनि नख'र ओन्सोल एबा बियाबआव राइजो-राजाफोरनि गोबां भट मोननानै दोलोआ ओन्सोलनि सिङाव थानाय नोगोरारिफोरनि थाखाय अन्सायनाय आरो जौगालु खामानि मावगासिनो दं। सुबुंफोरनि आबुं हेफाजाब मोन्नायजों बि पि एफ दोलोआ बे खेबनि बिसायख'थियावबो देरहानायजों 4 थि खेबनि थाखाय काउन्सिलआव सरकार दाफिनगोन होन्ना बुंबावो।
