गोदान दिल्ली, 28 जानुवारी: कंगना रनटनि जानो गोनां सावथुन “ तेजस" नि सुटिंआ माब्लानिफ्राय जागोन बेखौ फोसावबाय। बे सावथुननि सुटिंआ फैगौ डिसेम्बरनिफ्राय जागायगोन। कंगनाया फाव खालामनो नागिरनाय तेजस सावथुना सासे साहज गोनां आरो गिनो रोङै फाइटार पायलटनि सल'। भारतीय अख्रांमा सान्थ्रिआ 2016 आव आइजोफोरखौ दावहा नांग्रा हान्जायाव थिसन्ना लाफानाय हादतनि गिबिसिन रैखाथि सान्थ्रिमोन।
बे जारिमिनारि जाथायजोंनो थुलुंगाखांनाय तेजस सावथुना। आरएसबिपिया गावनि सशेल मिडिया एकाउन्ट टुइटारआव सावथुननि सुटिं जागायगोनखौ मावख'आरि महरै फोसावदों आरो लोगोसे मोनसे पस्टारबो सेयार खालामदों, जेराव कंगनाखौ फाइटार पायलटनि कसाबआव नुदों। कंगनायाबो गावनि टुइटार एकाउन्टआव सावथुननि पस्टारखौ सेयार खालामनानै बेनि सोमोन्दै मिथिहोदों।
तेजस सावथुनखौ सर्वेश मेवाड़ाया बिथोन होगोन, रनि स्क्रेवभालाया प्रडियुस खालामगोन। रनीया गिबियाव बिक्की कौशलनि उरी: दा सार्जिकेल स्ट्राइक सावथुनखौबो प्रडियुस खालामदोंमोन। सावथुननि सोमोन्दै कंगनाया टुइटाराव बुंदों तेजसआ मोनसे गुवारै फोरमायनाय सल', जेराव गाव अख्रांमा सान्थ्रिनि पायलटनि आखुआव हाबा मावनो खाबु मोन्दों।
बेबादि सावथुननि बाहागो जानो मोन्नानै गाव सन्मान मोन्नाय बायदि मोन्दांदों, जेराव बे कसाबआव साफ्रोमबो जाहोलाव आरो जोहोलावजोफोरखौ सेलुट खालामनाय जागोन, जाय सानफ्रोमबो बे डिउटीयाव अबदान होयो । सर्भेश आरो रनीजों जयै खामानि मावनो मोन्नानै गाव एक्साइटेड जादों। कंगनाया बुंबावदों गावसोरनि बे सावथुना गुबुन आइजोफोरखौबो भारतीय अख्रांमा सान्थ्रियाव बाहागो लानो थाखाय थुलुंगाखांहोनो हागोन।
