कक्राझार, 11 अक्टबरः कक्राझार जिल्लानि सिङाव थानाय फकिराग्राम हाथायसालिआव थांनाय हरआव सोमजिनाय गिख्रंथाव अर खामनाय जाथायनि सायाव मेजिस्ट्रेट थाखोनि संदान्नो थाखाय कक्राझार जिल्ला बेंगिरि भास्कर फुकनआ बिथोन होबाय। बे अर खामनाय जाथायथिलियाव थांनानै रबिबारखालि जिल्ला बेंगिरि भास्कर फुकन, कक्राझार एस पि राकेश रशन, सोनाब कक्राझार बियाबनि एम एल ए रबिराम नार्जारी मोनहा खौरां लाहैदों ।
खौरां लाहैनायनि उनाव जिल्ला बेंगिरि फुकनआ जाथायनि सायाव संदान्नायनि गेजेरजों खहा जाजानाय गलादारफोरनो खहा सुफुंथाय होनायनि सायाव खुंथायजों सावरायनाय जागोन होन्नानै खोथा होयो। मख'नाय जायोदि, बे अर खामनाय जाथायाव गं 55 नि बांसिन गलाफोर अर खामनानै आबुङै सेवहांगार जादों लोगोसे 1 कौटिनि बांसिन धोनआ बे जाथायजों खहा जानायनि मोन्दांथि लादों। सरासन्ना संदान्नायनि गेजेरजों मिथिनाय बायदिब्ला बे अर खामनाय जाथायआ मोब्लिबयारि जोंखांनायनिफ्राय सोमजिदों। नाथाय खौरां लिरजासिमाव अर खामनाय जाथाय सोमजिनायनि गुबै जाहोनखौ मिथिनो मोन्नाय जायाखै।
