गोदान दिल्ली, 20 आगस्ट : तेलेगु सुपारस्टार प्रभासआ सावथुन तानाजी : दा अनसन्ग वरियरनि बिथोनगिरि अम राउतजों लोगोसे आदिपुरुष मुंनि 3 डि सावथुनआव फाव खालामनो थाखाय थियारि जादों, जायखौ हिन्दी आरो तेलुगु मोन्नैबो रावफोराव बानायनाय जागोन। उनाव तामिल, मलयालम, कन्नड़जों लोगोसे गोबां रावफोराव रावसोलायनाय जागोन। प्रभासनि बे गोदान सावथुनखौ फोसावनायाव अन्सायिगिरफोरा गोबां खुसि जादों। बेनि सोमोन्दै बाथ्रा सावरायनानै बाहुबलीनि फावखुंगुर प्रभासआ बुंदों, गासिबो फावआनो आलादा आलादा सेलेन्स थायो, नाथाय बे रोखोमनि माबेबा फावखौ खालामनायाव गौरबखौ मोन्दांथियो आरो बिबान गोनां जायो। बे सल'आव फाव खालामनो थाखाय उसु-खुथु जादों। अमआ बेखौ मोनसे मख'जाथाव महरै थियारि खालामदों।
गाव फोथायोदि, हादतनि लाइमोनफोरा सावथुनखौ अन्नाय होगोन। बिथोनगिरि अम राउतआ बे बाथ्रानि सायाव बुंदों, गावसोर मोनसे गोसो जानाय आरो गौरबजों लोगोसे बे रोखोमनि हाबाफारिखौ जागायदों। भुषण कुमार, कृष्ण कुमार, अम राउत, प्रसाद सुतर आरो राजेश नायरनि गेजेरजों बानायनो लानाय बे सावथुनआ आथिखालाव प्रि-प्रडाक्सननि खोलोबआव दङ। 2021 निफ्राय बेनि सुटिंखौ जागायनायनि मिजिं थिनाय जादों।
