पृथ्विराज नारायन देब मेचनि हेथायै गसर थिसनबाय इउपिपिएलआ

कक्राझार, 10 सेप्तेम्बर: इउपिपिएल राजखान्थि हान्जानि माइन'रिटि सेलआ बावैसो सानफोर सिगां हान्जानिफ्राय होखारजानाय पृथ्विराज नारायन देब मेचनि हेंथायै कक्राझार पुलिस थानायाव गसर थिसनबाय । 9 सेप्तेम्बरखालि कक्राझारनि मैदेरखर'आव थानाय हान्जानि मावखुलिआव मोनसे खौरांगिरि मेल खुंनायनि गेजेरजों इउपिपिएलनि माइन'रिटि सेलनि आफादगिरि हानिफ आलीआ बे बाथ्राखौ मिबथिहोदों। खौरांगिरि मेलआव माइन 'रिटि सेलनि आफादगिरि हानिफ आलीआ फोरमायनाय बादिब्ला, हान्जानिफ्राय होखारजानायनि उनाव इउपिपिएलनि आफादगिरि प्रमद बर' आरो हान्जानि गुबुन दैदेनगिरिफोरनि हेंथायै बायदि रोखोमनि बाथ्रा बांसावनाय आरो सोंखारिनायनि थाखाय पृथ्विराजनि हेंथायै गसर थिसन्नाय जादों ।

लोगोसे गसर थिसन्नाय बादियै पृथ्विराजनि हेंथायै गोख्रों राहा लानोबो खुंथायनिसिम दाबि दैखांदों। आलीआ अजद होनानै बुंदोंदि, पृथ्विराजआ हान्जानिफ्राय होखारजानायनि उनाव इउपिपिएलनि आफादगिरि प्रमद बर' आरो गुबुन दैदेनगिरिफोरखौ नंखाय दाय होनानै बायदि रोखोम रावजों ससियेलल मिडियानि गेजेरजों बांसावबाय थादों आरो बावैसो सिगां प्रमद बर' आरो गुबुन दैदेनगिरिफोरखौ जिन्ना आरो मिरजाफरजों रुजुदों।

 हान्जायाव थानाय समावबो इउपिपिएलनि संबिजिरनि हेंथा खामानि मावनायनि थाखाय पृथ्विराजखौ एरख'नाय जादोंमोन होन्नानै फोरमायनायजों लोगोसे सोलिफु समाव पृथ्विराजनि जोंगा-मागा जिउ दैदेन्नाय आरो बिथांनि गोबां कौटि रांनि बिगोमा जानायनि सायावबो सिबिआइनि संदान्नांगौ होन्नानै दाबि दैखांदों। बेजों लोगोसे पृथ्विराजआ इउपिपिएलआव थानाय समावबो बिपिएफ हान्जाजों सोमोन्दो लाखिनानै खामानि मावबोबाय थादों होन्नानैबो माइनरिटि सेलनि आफादगिरि हानिफ आलीआ अजद होयो।