दिल्ली, 30 सेप्तेम्बर : लेडाइ हादतगिरि एम भैंकेया नायडुनाव करना जानायनि खौरां मोननाय जादों, बियो बावयैसो समाव राइज्यो सभानि लोगोम बोथोर जथुमाआव सदनखौ सामलायदोंमोन। लेङाइ हादतगिरिनि सेक्रेटारियेटआ मोनसे टुइटआव बुंदोंदि जेब्ला भैंकेया नायडुखौ रुटिन टेस्ट नायनाय जादों अब्ला बिखौ करना पजिटिभ मोन्नाय जादों। नाथाय बे भाइरासआ जेबो लैखोन गैया। बियो न'आव क्वारेन्टाइन थादों।बिनि बिसि उषा नायडुखौ निगेटिभ मोन्नाय जादों। बिबो न आवनो आइसलेसनाव थादों।
करना भाइरासनि 70,589 गोदान केस मोन्नायजों लोगोसे हादतयाव कभिड-19 नि केसआ 61 लाख जाहैबाय। भारतआव थांनाय 24 घन्टायाव करना भाइरासनि 80,472 गोदान केस मोन्नाय आरो सा 1,179 सुबुंफोरा थैनायखौ रेकर्ड खालामनाय जादों। देहा मावख'नि डेटानि बादिब्ला, हादतयाव बे बेरामनि गाहामाव फैनाया 83.33 जौखोन्दो जाबाय आरो थैनायनि हारआ 1.57 जौखोन्दोआव सौफैबाय। महारास्ट्रआव करना भाइरासआ बांसिन गोहोम गोग्लैदों। बेवहाय दासिमाव 13,66,129 केसखौ थिसन्नाय जादों जेराव सा 36,181 सुबुंफोरा जिउ गोमोबाय।
