गोदान दिल्ली, 25 सेप्तेम्बर : दिल्ली दाङ-बाजिनि दायनिगिरि जवाहरलाल नेहरु इउनिभार्सिटिनि बारग' फरायसा उमर खालिदखौ 22 अक्टबरसिम बिजिरनायनि बेंखनयाव दैथाय हरनाय जादों। दिल्लीनि कड़कड़डुमा कर्टआ उमर खालिदखौ बिजिरनायनि जिम्मायाव दैथाय हरदों। दिल्ली पुलिसनि स्पेशेल सेलनिफ्राय उमर खालिदनि सायाव आयेननि बेरेखा हाबाफारि मावनायनि दाय जाबसिन्ना केस थिसन्दों। उमर खालिदनि सायाव दिल्ली दाङा बाजिनि खैसार सानायनि दाय जाबसिन्नाय दं।
उमर खालिदआ 10 सान पुलिस रिमान्डयाव दंमोन। बिनि रिमान्डआ 24 सेप्तेम्बराव जोबनायनि उनाव बिखौ फिन बिजिरसालियाव दिन्थिनाय जादों, जेरावनिफ्राय बिखौ 24 अक्टबरसिमनि थाखाय बिजिरनायनि बेंखनआव दैथाय हरनाय जादों। दिल्ली पुलिसआ उमर खालिदखौ 13 सेप्तेम्बराव ग्रेप्तार खालामदोंमोन। बेनि अखानायै बिजिरसालिया खालिदखौ 10 साननि रिमान्डयाव पुलिसनो गथायदोंमोन। मख'नो गोनांदि, नोगोरारि सोदांनाय आयेन (सि ए ए)नि हेंथायै 24 फेब्रुवारीयाव सा-सान्जा दिल्लीयाव हारियारि दाङा-बाजि जादोंमोन, जेराव सा 53 सुबुंफोरा थैदोंमोन आरो सा 200 सुबुंफोरा जोखोम जादोंमोन।
