गोदान दिल्ली, 28 डिसेम्बरः मुलुगनि गुबुन गुबुन हादतफोरजों लोगोसे भारतआवबो कभिड-19 जों सन्देरजानाय सुबुं अन्जिमाया बारायफिन्नो हमनायनि गेजेरावनो सुबुंफोरनि थाखाय एसे मोजां खौरां जानानै फैदों। भारत सरकारा थांखि लादोंदि, फैगौ जानुवारी दाननिफ्राय दुलाराय हादतआवनो कभिड भेक्सिन थुनाय हाबाफारिया जागायजेनगोन। बेनि थाखाय मिरु सरकारा हादतनि मोनब्रै राइज्योआव कभिड भेक्सिननि ड्राइ रान एबा ट्राइल खालामनाय हाबाफारिखौ जागायजेनसिगोन। मिथिनाय बायदिब्ला हादतनि पान्जाब, आसाम, अन्ध्र प्रदेश आरो गुजराटआव गाबोन 28 डिसेम्बरनिफ्राय भेक्सिननि ड्राइ रानआ जागायजेनगोन। भेक्सिननि ट्राइल खालामनाय हाबाफारिया सान्नैनि थाखाय गोजौआव मख'नाय राइज्योफोराव सोलिबाय थागोन।
भारत सरकारनि बेबायदि गोनां हाबाफारि लानायाव माखासे भेक्सिनखौ बाहायनायनिफ्राय जानगाराव दोन्नाय जादों। बेयाव थांखि लानायनि हाबाफारिया नायबिजिरनाय एबा टेस्ट खालामनायल' जागोन। जेराव मोनसे एप्सनि गेजेरजों थि समावनो फोरमानखौ मोन्नो हागोन। मिथिनाय बायदिब्ला दासिम भारतआव इमार्जेन्सि बाहायनायनि थाखाय मोनसेबो भेक्सिनखौनो गनायथि होनाय जायाखै। नाथाय बे समाव बांसिन जौखोन्दो दाबिदार जादोंदि, भारतआव टेस्ट खालामग्रा सिराम इन्सटिटिउटनि गेजेरजों बानायफुनाय अक्सफर्ड-एस्ट्रा जेनेका भेक्सिनखौनो बयनिख्रुइबो सिगाङाव बाहायनो थांखि लादों। मिरुनि ड्राग्स स्टेनडार्ड कन्ट्रल अर्गेनाइजेसननि मोनसे गोनां जथुम्मा खुंनायनिबो थांखि लादों । बे जथुमनायाव माखासे थांखिखौ लानायजों लोगोसे गनायथिबो होनाय जागोन। कभिड-19 निफ्राय रैखा मोन्नो थाखाय भेक्सिन होनायनि लाहार-फाहारआव राइज्योनि बिबानगिरि, कल्ड सेन बिबानगिरि, फोसावदिं, सोलोंथाइ आरो फोनांजाब बिबानगिरिफोरा माहारियारि थाखोनि फोरोंथाय लानाय जादों आरो गासै सा 2,360 बिबानगिरिफोरा फोरोंथाय लानाय हाबाफारियाव बाहागो लादों। दिनैनिफ्राय सान्नैनि हाबाफारिजों मोनब्रै राइज्योआव भेक्सिननि ट्राइल खालामनो लानाय लाहार-फाहार बायदियै भेक्सिनखौ बाहायनायनि सिगां मोनफ्रोमबो बेसादफोरखौनो आन्जाद खालामनाय जागोन। लोगोसे कल्ड स्टरेजनि सायावबो आन्जाद लानाय जागोन ।
भेक्सिन होनायनि थाखाय जेसेबां जाथावना बेखौ नोजोर होनानै बाहायनाय जागोन। बेनिखायनो ट्राइल खालामनायनि सिगांनो राइज्योनि गंफ्रोमबो जिल्ला देहा फाहामसालि, देहा मिरु आरो गुदि देहा मिरुजों लोगोसे बेसरकारि देहा फाहामसालि फोरावबो मिथिहोनानै ट्राइल खालामनो थांखि लादों। सान्नैनि हाबाफारिजों ट्राइल खालामनो थांखि लानायाव बेसादफोरखौ सिगां आन्जाद खालामनानै सिनायथिनाय आरो बेनि गुदिखौ मोन्दांथिनाय। ट्राइल खालामनाय हाबाफारियाव राइज्यो आरो मिरुजों दैथायजानाय बिबानगिरिफोरा गोनांथार नोजोर लाखिगोन।
