• Home
  • /
  • BTR
  • /
  • दासान्दि बि टि आरनि गासै हारिनि साफ्रोम राइजो-राजाफोरा बि पि एफनि फार्से अन्सायनाय गैलियाः प्रमद

October 17, 2020

दासान्दि बि टि आरनि गासै हारिनि साफ्रोम राइजो-राजाफोरा बि पि एफनि फार्से अन्सायनाय गैलियाः प्रमद

भबानिपुर, 17 अक्टबर: बि पि एफ दोलो दैदेन्नाय सरकारनि थान्दै, दोलोनि बिबानगिरिफोरा बि टि सिनि मोनसेबो जेंनाफोरखौ बोस्रांनायनि फार्से गोनांथि होबोयाखै । हाग्रामा महिलारि दैदेन्नाय बि पि एफ दोलो, सरकारआ गेना खान्थि आरो बेले-बेजे खान्थि गैयैबादि खुंथायखौ सामलायबोनायनि थाखायनो सुबुंफोरनि जेंनाफोरा बोस्रांजायाखै आरो जौगानायनि मुङाव फैनाय रांफोरखौ लुथिनायनि थाखाय दासान्दि बि टि आरनि गासै हारि-हारिसानि साफ्रोम राइजो-राजाफोरा बि पि एफनि फार्से अन्सायनाय गैलिया होन्नानै गोख्रों रावजों बि पि एफ दोलोखौ सोंखारियो इउ पि पि एल दोलोनि आफादगिरि प्रमद बर'आ।

शुक्रबारखालि बि टि आरनि सालबारि महकुमानि सिङाव थानाय मथनगुरि बियाबनि गेंरामारा बाजाराव खुंनाय इउ पि पि एल दोलोनि मोनसे गेदेर सुबुं गौमायाव बाहागो लानानै दोलोनि आफादगिरि बर'आ फार्सेनिफ्राय बि पि एफ दोलोखौ बिबुंथिजों गाग्लोबनानै मोनसेनि उनाव गुबुन मोनसे अजद खालामदों । इउ पि पि एलनि आफादगिरि प्रमद बर'आ गावनि बिबुंथियाव बुङोदि, थांनाय 17 बोसोराव बि टि सिनि मोनसेबो हारि-हारिसाफोरानो गोजोन्नाय गैया। मोनफ्रोमबो हारि-हारिसानि सुबुं जौगानायनि थाखाय फैनाय सरकारि धोनफोरखौ बि पि एफ दोलोनि दैदेनगिरि आरो मावफारियाफोरा धोन लुथिनानै खुंथायखौ थेर-बेथेर खालमदों होन्नानै अजद खालामो हाग्रामा महिलारिनि दैदेन्नाय बि पि एफ सरकारनि एबा दोलोनि दैदेनगिरि आरो बिबानगिरिफोरा सरकारि बिथांखिनि धोनफोरखौ लुथिदों। एम जि एन आर इ जि ए बिथांखियाव थिसनजानाय जब कार्ड श्रमिकनि धोन, बोराय पेन्सननि धोन, रान्दि पेन्सननि धोन, सेल्फ-हेल्फ ग्रुपनि धोन, सानजौफु जाग्रा आदार जगायथाय बिथांखिनि धोन, अंगनबादि मिरुनि गथ'सा आदार जगायथायनि धोन, आबादारिफोरनि थाखाय फैनाय मदतनि धोन बायदि गोरिबफोरनि थाखाय फैनाय बिथांखिफोरनि रांफोरखौ हाग्रामा महिलारिनि दैदेन्नाय बि पि एफ दोलो-सरकारि बिबानगिरिफोरा जानानै हजम खालामदों। बि टि सियाव बि पि एफनि सुबुं थान्दै, दोलोनि दैदेनगिरिनि सोमोन्दोयारि जानाय सुबुंफोराल'सो साख्रि मोन्दों होन्नानै गोख्रों अजद खालामबावनायजों लोगोसे गोजौ सोलोंथाय लानाय लाइमोन सेंग्रा-सिख्लाफोरा रां होनो हायैयाव साख्रिनिफ्राय जानगारनानै थानांदों होन्नानै बुंबावो। 

Promod Boro, President UPPL

महिलारिनि दैदेन्नाय बि पि एफ दोलोनि सरकारि समाव बेफोर गासैबो बेले-बेजे आरो खान्थि गैयै खुंथायनि थाखायनो दिनै बि टि आरनि मोनफ्रोमबो हारि-हारिसानि सुबुंफोरा बे खेबनि बिसायख'थियाव बि पि एफ हान्जाखौ बोखारनो थियारि जादों। बि टि आर गोरोबथानि गेजेरजों दफाफोरखौ नोजोर होनाने, इउ पि पि एल दोलोनि आदर्श आरो नीतिनि मोनफ्रोमबो आयदानि सायाव सुबुंफोरा थुलुंगाखांनायजों बि टि आरनि गासै 35 लाख राइजो-राजाफोरनि गेजेराव 14 लाख भटारफोरा इउ पि पि एल दोलोनि सोद्रोमाफोरखौ देरहाहोनायनि थांखिजों हान्जायाव हाबफैगासिनो होन्नानैबो रायखाङो। बि टि आरनि मोन 40 बियाबआवबो राइजो-राजाफोरा दासान्दि दोलै-नोगोरै इउ पि पि एल दोलोखौ हेफाजाब होनो सिगांबोनायखौ नोजोर होनानै बे खेबाव इउ पि पि एल दोलोया बि टि आर खुंथायखौ दखल खालामगोन होन्नानै प्रमद बर'आ दाबि खालामदों। बर'आ गावनि बिबुंथियाव बुंबावोदि, बि पि एफ, गन सुरक्षा पार्टि बायदि दोलोफोरा बि टि आरआव राइजो-राजाफोरखौ राजखान्थिनि मोन्थाय, हा मोन्थायफोरा गोमागोन होन्नानै जेरैबायदि नंखाय बांसावदों बेयो ओन्सोलनि गोजोनै थानाय राइजो-राजाफोरनि गेजेराव मोनसे गुलाय-गुजाय खालामनो नाजानाय मोनसे सोलो-बोलोसो होन्नानै बुङो। बि टि आरआव गोदान गोरोबथा बादियै ओन्सोलनि मोनफ्रोमबो हारि-हारिसाया राजखान्थिनि मोन्थाय, हानि मोन्थायखौ मोनगोन । फैगौ सनफोराव बि टि आरआव इउ पि पि एल दोलोया सरकार दाखांनायनि उनावनो मोनफ्रोमबो हारि-हारिसानि हानि मोन्थाय, राजखान्थि मोन्थायखौ रोखा खालामना होगोन होन्नानै गावनि बिबुंथियाव फोसावयो। लोगोसे बि टि आरआव दासान्दि 40 बियाबनि सोलायै 60 बियाबसिम बारायनाय जागोन होन्नानै रायखांना इउ पि पि एल दोलोनि आफादगिरि बर'आ बुंबावोदि, जायखि-जाया हारिनि सुबुंफोरानो सरैखाथि न’ बियाबफोरावबो बिसायख'थि गेलेनो हागोन।

बेनि गेजेरजों मोनफ्रोमबो हारि-हारिसायानो राजखान्थिनि मोन्थायखौ मोन्नो हागोन । बेबायदिनो हा मोन्थायनि बिथिङावबो मोनफ्रोमबो हारि-हारिसानि थान्दैफोरखौ लोगोसेयै लाना बि टि आरआव मोनसे लेन्ड एडभाइजारि बर्ड दाफुंनाय जागोन होन्ना फोसावयो। फार्सेथिं बि पि एफ दैदेन्नाय सरकारा सिगाङाव बेबायदि आइनखौ आजावनानै लायाखै होन्ना अजद खालामनानै प्रमद बर'आ हा मोन्थायनि बिथिङाव मोनफ्रोमबो हारि-हारिसायानो समान मोन्थायखौ मोन्नो हागोन होन्नानै मिथिहोबावदों। मख'नो गोनांदि, गांगामाराजों लोगोसे निमुवा बाथौ आश्रम आरो लाबदांगुरियावबो आलादा आलादायै खुंनाय गुबुन मोन्नै इउ पि पि एल दोलोनि सुबुं मेलयावबो दोलोनि आफादगिरि प्रमद बर'जों लोगोसे सालबारि बियाबनि बिजाथि बिनद मसाहारि, मथनगुरि बियाबनि बिजाथि साहजाहान आलि आहमेद, इउ पि पि एल दोलोनि मिरु दैदेनगिरिफोर, फावखुंगुर फैला जे बरगयारि, एयाद आलि, बाथौ महा सभानि मिरुनि गाहाय नेहाथारि बसन्त स्वर्गियारिआबो मेलआव बिबुंथि लाखिनायजों लोगोसे गुबुन गुबुन दैदेनगिरिफोराबो बाहागो लादोंमोन ।

फार्सेथिं निमुवा बाथौ आश्रमआव खुंनाय मेलआव प्रमद बर'जों लोगोसे इउ पि पि एल दोलोनि बिजाथिखौ बरायनाय जायो। बेनि अनगायैबो लाबदांगुरियाव खुंनाय मेलआव सा 65, गांगामारायाव खुंनाय मेलयाव सा 52 गासै 117 सुबुंफोरा बि पि एफ, गन सुरक्षा पार्टिनि हेफाजाबगिरिफोरा इउ पि पि एल दोलोयाव हाबफैयो।

Share with your friends!

Related Posts

न’खर न’खर हादरारि फिरफिला बिरहोनाय थांखिजों 24BN SSB नि गोलाव हान्जा सुरनाय ।

न’खर न’खर हादरारि फिरफिला बिरहोनाय थांखिजों 24BN SSB नि गोलाव हान्जा सुरनाय ।

बाक्सा जिल्ला एबसुनि बोसोरसालिया जथुम्मा खुंफुंनो रायदाव आफादखौ दाफुंबाय

बाक्सा जिल्ला एबसुनि बोसोरसालिया जथुम्मा खुंफुंनो रायदाव आफादखौ दाफुंबाय

आसामाव जेब्लासिम BJP सोरखार थागोन अब्लासिम फिसा फिसा हारि हारिसाफोरनि मोन्थायफोरा जोबस्रांलांगोन : कास्तम बसुमतारि

आसामाव जेब्लासिम BJP सोरखार थागोन अब्लासिम फिसा फिसा हारि हारिसाफोरनि मोन्थायफोरा जोबस्रांलांगोन : कास्तम बसुमतारि

संका बानदो, जामफैनि दैखौ बानदो थेनानै दै दिखांनो हायैजों जिंगा सिनांदों माखासे आबादारिफोरा

संका बानदो, जामफैनि दैखौ बानदो थेनानै दै दिखांनो हायैजों जिंगा सिनांदों माखासे आबादारिफोरा

Published by

Bodosa


Bodosa is a Daily Newspaper, printed in Bodo language.

Leave Your Comment Here