डिब्रुगड़, 22 आगस्टः डिब्रुगड़ जिल्लानि कालिबारि ओन्सोलाव पुलिसआ संदान्नायनि गेजेरजों शुक्रबारखालि गासै 300 ग्राम ब्राउन सुगारजों लोगोसे सासे फालांगिखौ खादों। जाथायनि बागै सुलुंनिफ्राय मिथिनाय बायदिब्ला डिब्रुगड़ पुलिसआ हरखाब संदान्नानै ड्राग्सजों लोगोसे इउनिस खान मुंनि सुबुंखौ खादों।
डिब्रुगड़नि पुलिस बिबानगिरि श्रीजित तिआ बुङोदि, मोनसे जरखा सुलुंखौ मोन्नो हानानै राजिब शइकियानि दैदेन्नायाव डिब्रुगड़ पुलिसआ इउनिस खान मुंनि सुबुंनि न'याव संदानो। बेनि गेजेरजों पुलिस हान्जाया इउनिस खाननि न'निफ्राय 300 ग्रामनि ब्राउन सुगारखौ बोखांनो हायो।
बे जाथायाव लोब्बा थानाय इउनिस खाननि हेंथायै एनडिपिएस एक्ट 1985 नि सिङाव मोनसे केस आजावना लायो। पुलिसआ मिथिहोदोंदि, बोखांनो हानाय ड्राग्सनि बेसेना खमैबो 30 लाख रां जागौमोन। सुलुंनि बायदिब्ला डिब्रुगड़ जिल्लायाव थांनाय माखासे साननिफ्रायनो आइन बेरेखायै ड्राग्सनि फालांगिया सोलिबाय थानायखौ नोजोर लाखिनानै सन्देह' खालामजाथाव सुबुंफोरखौ संदान्नाय जादों।
जिल्लानि सिङाव गोबां सुबुंफोरनि बे आइन बेरेखा खामानियाव लोब्बा थानायखौ मिथिनानै गुबुन गुबुन समाव डिब्रुगड़ पुलिसआ संदान्नानै गोबां ड्रागस फालांगिफोरखौ हमनो हादों होन्नानै पुलिस बिबानगिरिया मिथिहोयो।
