• Home
  • /
  • BTR
  • /
  • जिल्ला खुंगिरिया सुबुंफोरखौ मास्क गान्नांगौनि गोनांथारै बिथोन होदों

September 23, 2020

जिल्ला खुंगिरिया सुबुंफोरखौ मास्क गान्नांगौनि गोनांथारै बिथोन होदों

काजलगाव, 23 सेप्तेम्बरः राइज्योनि सिङाव थानाय गुबुन गुबुन जिल्लाफोराव जिल्ला खुंथायआ थागिबि नोगोरारिफोरखौ कभिड-19 नि गोसारनाय थासारियाव सांग्राङै आरो रैखाथियै थानो फोसावबाय थानायनि गेजेरावनो आसाम सरकारनि बिथोन होनायाव चिरां जिल्लानि खुंगिरि गौतम तालुकदार आरो चिरांनि डि डि एम ए नि मासिगिरिया सुबुं थुबुर जानाय जायगाफोराव गोनांथारै मास्क गान्नांगौनि बिथोन होदों।

Face Mask

जिल्लानि जेरै बाजार, देहा फाहामसालि, मावख' बायदि सुबुं थुबुर जानाय ओन्सोलाव सुबुंफोरखौ देहा आरो जिउ रैखाथिनि थाखाय गोनांथारै मास्क गान्नांगौ होन्नानै बिथोन होनायजों लोगोसे जिल्ला खुंगिरि गौतम तालुकदारआ राइज्यो सरकारनि बिथोन बायदियै फोसावदोंदि- जिल्लानि सिङाव कभिड-19 नि गोसारनाय जिन्ज्रिखौ बसनो आरो दबथायनो थांनायाव जाहाथे सुबुंफोरा देहा बिफाननि फोसावनाय नेम-खान्थिखौ गोनांथारै फालिनांगौ होन्नानै बुङो। आसाम सरकार आरो चिरां जिल्ला खुंथायनि फोसावनाय बिथोन बायदियैब्ला मास्क गाना लासेनो सासेबो सुबुंफोरा मेल-मिटिं आरो जमा जानाय थावनियाव बाहागो लानो मोन्नाय नङ। बेनिखायनो जायखि-जाया सुबुङानो बाइजोआव ओंखारनाय लोगो-लोगो आरो गारि-मथर सालायनाय समावबो खुगायाव मास्क गान्नाया गोनांथार जादों। बेजों लोगोसे गासै सुबुंफोरानो जायखि-जाया मावख' एबा मावबाय थानाय खामानियाव मास्क गान्नायाबो गोनांथार जागोन। 

फोसावनाय बिथोनआव रायखांनाय बायदिब्ला सासे सुबुङा गावनि मास्कखौल' बाहायनो एबा गान्नो हागोन, गुबुन सुबुङा बाहायखोन्दा मास्कखौ गान्नो मोन्नाय नङा । बेजों लोगोसे कभिड-19नि खैफोदनिफ्राय रैखाथि मोन्नो थांनायाव सुबुंफोरा गाव-गावनि गान्नाय-जोमनाय जि, गस्लाफोरखौबो मोजाङै साबोनजों सुनांगोन आरो गानखांनायनि उनाव जि-जोमफोरखौ गुदुं दैयाव सुनाय हुदाखौ बाहायनांगौनि फोसावनाय जादों। जुदि, सोरबा सुबुङा फोसावनाय बिथोननि आयेनखौ बारोब्ला एबा सिफायोब्ला बेनि सायाव आइ पि सिनि 188 सेक्सननि सिङाव गोख्रों आयेनारि साजाजों मोगा-मोगि जानांगोन। गोजौआव मख'नाय आयेनफोरखौ सिफायग्रा सुबुंनि सायाव 500 रां आरो नैथि साजायाव 1000 रां जुरिमानाबो फोनांनाय जागोन। जिल्ला खुंगिरि गौतम तालुकदारआ जिल्लानि गासैबो नोगोरारिफोरखौ खानानै होनाय आइनखौ थि समावनो फालिनो फोसावनायजों लोगोसे बे थासारियाव समाजयारि जान्थाय थानाय हुदाखौबो फालिनो फोसावनाय जायो। जिल्लायाव बे फोसावनाय बिथोननि आयेनआ मंगलबारनिफ्राय जागायजेननानै आरो बे आयेनखौ जेब्लासिम बोखांना लाफिनजाया अब्लासिम सोलिबाय थागोन।

Share with your friends!

Related Posts

न’खर न’खर हादरारि फिरफिला बिरहोनाय थांखिजों 24BN SSB नि गोलाव हान्जा सुरनाय ।

न’खर न’खर हादरारि फिरफिला बिरहोनाय थांखिजों 24BN SSB नि गोलाव हान्जा सुरनाय ।

बाक्सा जिल्ला एबसुनि बोसोरसालिया जथुम्मा खुंफुंनो रायदाव आफादखौ दाफुंबाय

बाक्सा जिल्ला एबसुनि बोसोरसालिया जथुम्मा खुंफुंनो रायदाव आफादखौ दाफुंबाय

आसामाव जेब्लासिम BJP सोरखार थागोन अब्लासिम फिसा फिसा हारि हारिसाफोरनि मोन्थायफोरा जोबस्रांलांगोन : कास्तम बसुमतारि

आसामाव जेब्लासिम BJP सोरखार थागोन अब्लासिम फिसा फिसा हारि हारिसाफोरनि मोन्थायफोरा जोबस्रांलांगोन : कास्तम बसुमतारि

संका बानदो, जामफैनि दैखौ बानदो थेनानै दै दिखांनो हायैजों जिंगा सिनांदों माखासे आबादारिफोरा

संका बानदो, जामफैनि दैखौ बानदो थेनानै दै दिखांनो हायैजों जिंगा सिनांदों माखासे आबादारिफोरा

Published by

Bodosa


Bodosa is a Daily Newspaper, printed in Bodo language.

Leave Your Comment Here