गरेश्वर, 4 नभेम्बरः बि टि आर गोरोबथानि 3.1 दफायाव मख'नाय बादियै बि टि आरआव गामि सोसननाय आरो दानख'नायनि सायाव खामानि मावनो एबा नयसंनो थाखाय बिबान होजानाय थामहिनबा सरकारजों दानानै होजानाय कमिसननि सोद्रोमा जयन्त बसुमतारीआ सोद्रोमा महरै थिसनजानायनि उननिफ्रायनो बि टि आर आरो बि टि आरनि बाइजोआव थानाय दाब दाब जायगाफोराव गामि दानख'नाय आरो सोसननायनि सायाव सोमजिनाय गोनो-गोथोखौ गैया खालामनो थाखाय राइजो-राजाफोरखौ लानानै मेल खुंबोदों आरो सावरायबोदों। बेबादिनो मंगलबारखालि बाक्सा जिल्लानि सिङाव थानाय गरेश्वर हालामनि बामुनझार गामियाव ओनसोलनि राइजो-राजाफोरखौ लानानै बि टि आरआव गामि दानख'नाय आरो सोसननाय आयदानि सायाव मोनसे सावराय मेल खुंनाय जायो। गरेश्वर दख'रा एबसुनि बान्जायनायाव खुंफुनाय बे सावराय मेलआव गाहाय आलासि महरै बाहागो लानानै एबसुनि लेङाइ आफादगिरि एबा कमिसननि सोद्रोमा जयन्त बसुमतारीआ बि टि आरआव गामि सोसननाय आरो दानख'नायनि बागै मेलआव बाहागो लानाय राइजो-राजाफोरनि सिगाङाव गुवारै आरो गेबेङै फोरमायथिनानै होयो।
मेल जोबनायनि उनाव खौरांगिरिफोरजों मोगा-मोगि जानाय समाव जयन्त बसुमतारीआ फोरमायनाय बादिब्ला थांनाय 2 नभेम्बरखालि कमिसनआ मोनसे प्रिलिमिनारी मेल जथुमनाय जादोंमोन। बे मेलआव बि टि आरआव गामि सोसननाय आरो दानख'नायनि खामानिखौ कमिसननि गेजेरजों माबोरै आवगायलांगोन बेनि सायाव सावरायनाय जादों। बबेखानि बे आयदानि सायाव फैगौ सानफोराव थि सम आरो अक्ट' लानानै कमिसननि मेलखौ जथुमबावनाय जागोन । बिथाङा बुंबावोदि, बि टि आरनि सिमा ओनसोलनि गामिफोरा हाबनाय आरो ओंखारनायनि थाखाय कमिसननि आखायाव आर'ज बिलाइ गथायनो हागोन। बेनिथाखाय कमिसनआ सम आरो अक्ट' सिमा खानानै होगोन। नाथाय दासिमाव खोला आरो सान्जा सिमाजों नांजाबनाय गामिफोरखौ सोस'ननाय आरो दानख'नाय बेलायाव खामानि मावनायखौ आवगायनो हायाखै बेनि थाखाय माखासे सम नेथ'बावनांगोन। फैगौ 1 सप्टाहनि उनावनो गामि दानख'नाय आरो सोसननायनि खामानिफोरखौ माबोरै मावफुंनाय जागोन बेनि बागै खौरां बिजोंनि गेजेरजों कमिसनआ रोखायै आरो गेबेङै फोरमायथिनानै होगोन।
बि टि आर गोरोबथानि 3.1 दफायाव मख’नाय बादियै गामि सोसननाय आरो गामि दानख'नायखौ लानानै गोबां सुबुंफोरनि गोसोयाव गोनो गोथो आरो गिनाय सोमजिखांदों नाथाय बे आयदाखौ लानानै राइजो-राजाफोरा गिनांगौनि आरो जिंगासिनांगौनि गोनांथि गैया। खोला सिमायाव थानाय ट्राइबेल बेल्ट आरो ब्लक ओनसोलफोरा माब्लाबाबो बि टि आरनिफ्राय दानजानाय नङा। नाथाय जाय गामिया जेनेरेलयै दं एबा ट्राइबेल बेल्ट एण्ड ब्लकआव गोग्लैया बे गामिखौसो बि टि आरनिफ्राय ओखारलांनो हानायनि खाबु होनाय जागोन । बि टि आरआव जायखि राजखान्थि हान्जाया सरकार दायामानो गामि दानख'नाय आरो सोसननायनि बेलायाव होबथानो हानाय नङा बेखौ आसाम सरकार आरो भारत सरकारआ खोथा होखानाय बादियैसो कमिसननि गेजेरजों मावफुंगोन होन्नानै जयन्त बसुमतारीआ फोरमायथिबावो।
