टकिय', 16 सेप्तेम्बर: थांनाय बावैसो साननि गेजेराव जालांनाय इउएस अपेन ग्रेन्ड स्लेमनि सिंगेल्स आइजो गेलेनायनि फाइनाल मेचखौ देरहानो हानाय जापाननि गेलेगिरि नाओमि असकाया बे समाव रेंकिंनि 3 थि सारियाव जायगा लानो हानायाव जाफुंसारदों। दिनै डब्लिउटिएआ गोदानै फोसावनाय आइजो रेंकिंनि फारिलाइ बायदियै जापाननि नाओमि असकाया 6 थि सारिनिफ्राय मोन 3 जायगाखौ बारनो हानानै थोंजोङै 3 थि सारियाव जायगा लानो हादों।
मख'नो गोनांदि, इउएस अपेननि सिंगेल्स फाइनाल मेचआव असकाया बेलारुसनि गेलेगिरि भिक्टरिया आजारेंकाखौ फेजेन्नो हानायज बे बोसोरनि बेसेन गोनां ट्रफीखौ आजावनो हायो। गुबुन फारसेथिं अष्ट्रेलियानि आइजो गेलेगिरि एस्ले बार्टि आरो रमानियानि सिमना हालेपआ मुलुगनां आइजो रेंकिंयाव सेथि आरो नैथि जायगाखौ लानो हाफिन्दों । मख'नो गोनांदि, बिसोर सानै आइजो गेलेगिरिया थांनाय बावैसो साननि सिगां जालांनाय इउएस अपेनाव कभिड-19 नि जाहोनाव बाहागो लानायनिफ्राय जानगाराव थादोंमोन । बिसोर गोख्रों गेलेगिरिनि बाहागो लायैयाव जापाननि आइजो असकाया गावनि गोख्रों गेलेनायजों फाइनाल मेचखौ देरहानो हानायजों लोगोसे रेंकिंयावबो गावनि आवगायनानै जायगा लानायखौ सोलायनो हानायाव खाबु मोन्दों।
गुबुन फारसेथिं इउएस अपेननि फाइनालखौ जेननांनाय मुलुगनां रेंकिंनि बारग' सेथि गेलेगिरि भिक्टरिया आजारेंकाया थांनाय इउएस अपेननि फाइनालखौ गेलेनो हादोंब्लाबो नाथाय डब्लिउटिएनि गोदानै फोसावनाय रेंकिंआव 59 थि सारियावसो जायगा लानांदों। बेबायदिनो मुलुगनि गुबुन गुबुन हादतनि आइजो टेनिस गेलेगिरिफोरा दासान्दि गेलेनो हायैजों मुलुगनां टेनिस रेंकिंनिफ्राय दावख्लायनाय आरो दावखोनायखौ नुनो मोन्दों।
