बेइजिं, 25 आगस्ट: करना भाइरास गोसारनायनि खौरांखौ गोबावजों मुलुगनो होनाय चीनआ भेक्सिनखौबो सिरि सिरियै बाहाय खोमादों। चीनयाव थांनाय 1 दाननिफ्राय करना भेक्सिन बाहायनायखौ जागाय जेनबाय। चीननि सासे गागि बिबानगिरिया रबिबाराव फोरमायदों चीनयाव फाहामगिरि मावसुमाफोर आरो सिमा रैखाथि बिबानगिरिफोरनो थांनाय 1 दाननिफ्राय करना टीकाखौ थुनाय जादों।
सरकारनि सामलायनाय सिसिटिभिनो होनाय मोनसे इन्टारभिउयाव नेसनेल हेल्थ कमिसननि साइन्स एन्ड टेक्नलजि डेभेलपमेन्ट सेन्टारनि डाइरेक्टर झेंग झोंग वेइआ बुंदों, सरकारआ 22 जुलाइयाव करना भेक्सिनखौ इमार्जेन्सि बाहायनो गनायथि होदोंमोन । चीननि टीका सामलायगिरि आयेनआ इमार्जेन्सि बाहायनायनि गेजेरजों गनायथि गैयै टीकाखौ बै सुबुंफोरनि सायाव बाहायनो गनायथि होदों जायफोरनाव करना जानायनि खैफोदा बांसिन दं। चीनयाव मोन 7 था करना भेक्सिननि सायाव आन्जाद नायनाया सोलिगासिनो दं।
बेफोरनि गेजेराव मोन 4 था करना भाइरासनि आन्जाद नायनाया जोबथा खोलोबयाव दं। झेंग झोंग वेइआ बुंदों गावसोर माखासे करना पेकेज बानायदों, जेराव मेडिकेल गनायथि फार्म, नोजोर होनाय यजनानि गाज्रि गोहोम गोग्लैनाय, रैखाथि यजना, रांखान्थि अन्सुथाय होनाय यजनाया दंफा देरो।
