कुमारिकाता, 31 अक्टबर: भारत-भुटान सिमनानि बागसा आरो उदालगुरि जिल्लानि गेजेराव थानाय दावबायथिलि बगामातिआ गोजां बोथोर सौफैनाय लोगो लोगो दावबायारिफोरखौ बरायनो साग्रिद जाफिनबाय। बे दावबायथिलिखौ गोदान महर होनायाव गुबैयै ग्रीन ट्रेक एडभेन्सार आरो गेरेमसा मुंनि मोननै आफादआ मैखोम बिफाव लानानै दावबायथिलिखौ समायना महर होसिन्दों। थांनाय बोसोराव भुटाननिफ्राय बोहैबोनाय बरनदि दैसानि दै बानाया बगामातिआव थांनाय लामा-दालांफोरखौ खहा खालामनानै हान्थिजायै खालामनानै गालांदोंमोन। बे बायग्रबलांनाय हान्था-मेला राहाखौ दावबायारिफोरनि गाहामनि थाखाय बानायनानै गोदान महर होफिन्दों गेरेमसा एनजिअ आफादआ।
आफादनि बिबानगिरि प्रदिप बसुमतारिनि दैदेन्नायाव तामुलपुरनिफ्राय नाग्रिजुलि, गुवाबारि जानानै बगामातिसिम थांनाय गोलाव किलमिटार लामानि फारनै थिंजाय थानाय गुदु हाग्राफोरखौ एवस्रांनानै मथर आरो मथर साइकेल सालायनो हानाय खालामनायजों लोगोसे दावबायारिफोर लाबोनाय गारि-मथरफोर पार्किंनि थाखायबो राहा खालामबाय। बगामातिआ लावखार ओंखाम जानायनि थाखायल' नङा। बेयाव बायदिसिना गेलेमु जेरै- राफ्टिं, जिपलाइन, नाव, ट्रेकिं बायदिसिना एडभेन्सार खालामनायनि राहाबो दङ। हादत आरो गुबुन हादतनिफ्राय फैनाय दावबायारिफोरनि गोसो बोनो हानाय थावनिआनो जादों बगामातिनि बौद्ध मुसुखा। बेनि अनगायैबो बगामातिनि हाजो आरो गुदु हाग्रायाव आसामनि गुबुन जायगायाव नुनो मोनफेरै दावसिन-दावलाफोरबो नुनो मोन्नाय जायो। दावबायारिफोरनि थाखाय बगामातिआव बर'फोरनि ओंख्रि-ओंखामजों लोगोसे बायदिसिना जाग्रा-लोंग्राबो मोन्नाय जायो। जायखौ हादतजों लोगोसे गुबुन हादतनि दावबायारिफोरा गोसो होनानै जानो हायो।
देग्लाय करना भाइरासनि थाखाय बे मोननै आफादआ दावबायारिफोरनि थाखाय माखासे गोनांथार राहाफारि खानानै होदों। मिथिंगानि बे निजोम थावनिआव जाहाथे गुबुंले आबहावा सोमजिनो हाया बेनि थाखाय दावबायारिफोरखौ प्लास्टिक बाहायनाय आरो गोब्राब सोदोबजों माइक आरि दामनायखौ होबथानायबो फोसावदों। मख'नो गोनांदि, नभेम्बर दाननिफ्राय फेब्रुवारी दानसिम बगामातिआव लावखार ओंखाम जानाय आरो दावबायनायनि थाखाय थार सम। बगामातिआव थांनो थाखाय बाइहाता सारिआलिनिफ्राय गरेस्वरजों नङाबा रङिया, तामुलपुर-नाग्रिजुलि, गुवाबारि लामाजोंबो बगामातिआव थांनो हायो।
