गिबि मन्थ्रिआ कलिकामुख आरो कार्तिक चापरिसिम खारनो फेरि सिबिथायखौ बेखेवबाय

दिसपुर, 8 सेप्तेम्बरः गिबि मन्थ्रि सर्बानन्द सनवालआ 7 सेप्तेम्बरखालि जरहाट जिल्लायाव दावबायहैनानै गुबुन गुबुन हाबाफारियाव बाहागो लानायनि अनगायैबो कालिकामुखआव खुंनाय मोनसे हाबाफारियाव कालिकामुख आरो कार्तिक चापरिसिम खारनो गोनां गंसे फेरि सार्भेसखौ बेखेवनानै होबाय। बे फेरिनि गेजेरजों रोगाथाय बिफानआ रांखान्थि बिथिङाव गोख्रोंसिन जागोन होन्नानै गावनि बेखेवनाय बिबुंथियाव गिबि मन्थ्रिआ बुंथियो। हाबाफारियाव गिबि मन्थ्रिआ बुङोदि, थांनाय गोलाव बोसोरनिफ्रायनो कालिकामुख आरो कार्तिक चापरिनि सुबुंफोरा फेरि सिबिथायखौ बेखेवनांगौनि दाबि खालामबोबाय थानाया दिनै जाफुंबाय। बेनि गेजेरजों जायगानि सुबुंफोरा दैमानि बिखायाव थांलाय-फैलाय खालामनायनि फार्से खाबु गोनां जागोन होन्नानै बुंथियो।

गिबि मन्थ्रि सनवालआ बुङोदि, फेरि सिबिथाया अरायथायै सोलिबाय थायैनि जाहोनावनो बुर्लुबुथुर दैमानि रुगुङाव थानाय सुबुंफोरनि थांलाय-फैलाय खालामनाय फार्से गोनांथिबादि सोलिनो हायाखै। नाथाय रांखान्थि बिथिंजों लोगोसे ओन्सोलाव दावबायारिफोरनि दावबायनाय अन्जिमायाबो बांसिन जागोन होन्नानै गिबि मन्थ्रिआ मिजिं लाखियो। बे हाबाफारियावनो गिबि मन्थ्रि सनवालआ फेरि सिबिथायनि होनायनि सायाव नाजाथाबनाय एबा बिबान लानाय जादब पायेंखौ साबायखर होयो। लोगोसे जायगानि सुबुंफोरखौबो साबायख'र बाउयो। बेखेवनाय हाबाफारियाव बिमल बरा, आबहावा सं रैखाथि खालामग्रा यादब पायें, जिल्ला खुंगिरि रश्नी कराति, आइ डब्लिउ टिनि बिथोनगिरि गौतम दास आरो माखासे माननि सुबुंफोराबो बाहागो लादोंमोन।