गुवाहाटी, 6 सेप्तेम्बर: सुबुंथि गैयै आखुजों खामानि मावग्रा सासे गथ साखौ खास्त्रि-बिस्रि दै गुदुंजों देहायाव लुनानै होनाय जाथायनि गाहाय दायनिगिरि डाः सिद्दि प्रसाद देउरि आरो बिनि बिसि मितालि कँवरखौ पुलिसआ खाबाय। सुलुंनिफ्राय मिथिनाय बायदिब्ला बिसोर सानै बिसि-फिसाय फाहामगिरिखौ नगावनि रहानिफ्राय हमदों।
जाथायनि बागै मिथिनाय बायदिब्ला थांनाय माखासे साननि सिगां बिसि-फिसाय सानै फाहामगिरिया गावनि न'याव खामानि मावग्रा हिसाबै लाबोनाय सासे गथ'सानि देहायाव दै गुदुं लुनायनि गोख्रों अजदआव पुलिसआ सं दान्नानै डाः सिद्दि प्रसाद देउरि आरो बिसि मितालि कँवरखौ नगावनि रहायाव ए एस 06 भि 3839 नम्बरनि गंसे गारिजों थांबाय थानाय समावनो पुलिसआ बिसोरखौ हमो।
नगाव पुलिसनि हेफाजाबाव डिब्रुगड़ पुलिसआ हमनानै पुलिस थानायाव बिसोरखौ दासान्दि जाथायनि सायाव गुदि सं दान्नाया सोलिगासिनो दं। मख'नो गोनांदि, अन्नाय गैयै बिसोर फाहामगिरिआ गथ'सानि देहायाव दै गुदुं लुनानै गथ'साखौ गोब्राबै जोखोम खालामदोंमोन। बे जाथायखौ गुबुन गुबुन बिथिंनिफ्राय सांग्रां नोगोरारिफोरा गोनों रावजों सोंखारिनानै जाथायनि दायनिगिरिखौ गोख्रों साजा होनांगौनि पुलिस खुंथायनिसिम दाबि खालामदों।
