गुवाहाटी, 9 सेप्तेम्बर: फैगौ आसाम बिधान सभा बिसायख'थिखौ नोजोर होनानै दासान्दि खुंथायनि गोहोआव थानाय बिजेपि हान्जाया राइज्यो खुंथायनि गोहोखौ फिन दखलाव लाफिन्नो थाखाय दानिफ्रायनो बायदि रोखोमनि सुबुं अन्सायलु आरो जौगाखां बिथांखिफोर फोसावनायनि गेजेरजों बायदि रोखोमनि बुद्धि आरो खौसल बाहायगासिनो। बुब्लियावनो बिजेपिनि अनगायैबो गुबुन गुबुन राजखान्थि हान्जाफोराबो फैगौ बिसायख'थिनि थाखाय गावबा-गाव हान्जानि थाखाय थाख-थियारि खालामगासिनो थानायखौ नुनो मोन्दों ।
दासान्दि, राइज्योनि राजखान्थि फोथाराव फैगौ बिधान सभा बिसायख'थिखौ लानानै गावजों-गाव सोंखारिलायनाय, गाज्रि मुंसुनाय आरो बिबुंथिजों जुजिलायनाय बायदि थासारिखौ नुनो मोनहांदों । बेराफार्से फैगौ बिसायख'थिनि थाखाय कंग्रेस आरो अल इन्डिया इउनाइटेड डेमक्रेटिक फ्रन्ट (एआइइउडिएफ) नि गेजेराव लोगो जालायनाय आयदायाबो राइज्योनि राजखान्थि फोथाराव सावरायजाबाय थादों ।
बेराफार्से सोलिफु राइज्यो सरकारआव थानाय बि पि एफ हान्जाया कंग्रेस आरो एआइइउडिएफजों लोगो नांनाया फैगौ बिसायख'थियाव गावसिनि थाखाय जेबो गोहोम खोख्लैनो हानाय नङैखौ मोन्दांथि लादों। आसाम बिजेपिनि आफादगिरि रन्जित कुमार दासआ दाबिनानै बुंदोंदि, 2021 आसाम बिधान सभा बिसायखथियाव खर'सा आसामआव थाखानाय बियाबनि अनगायै गोदानै मोन 7 बियाबआव बिजेपिनि बिजाथिफोरा देरहानो हाबावगोन।
कंग्रेस आरो एआइइउडिएफनि गोरोबथा जानायानो बे उफ्रा बियाबफोराव देरहानायाव बिजेपिखौ मदद होगोन। दासआ दाबिनाय बादिब्ला, बिजेपिआ खर'सा आसामआव तिताबर, गलाघाट, मरियनी, धमदुमा, नाजिरा, शिबसागर आरो नावबैश्या बियाबफोरखौ बे खेबनि बिसायख थियाव देरहानाया रोखा जागोन। एरैहाय 2021 बिधान सभा बिसायख'थिनि उनावनो आसाम कंग्रेसनि दैदेनगिरि रिपुन बराया कंग्रेसनिफ्राय बिदाइ लानांसिगोन होन्नानैबो रन्जित कुमार दासआ गोखों अजद होयो।
