आथिखालनि गोदान मुगायाव सुबुंफोरा खर'नि खानायनि जेंनाजों जिंगायाव गोग्लैनांदों, जाय मोनसे सरासनस्रा जेंना जानानै फैदों। बे बेराम एबा जेंनानि गाहाय जाहोनआ सानफ्रोमबोनि हाबाफारिया गाहाम जानाय-लोंनाय, जिंगा सिनाय। नायिबिजिरसंगिरिफोरनि बादिब्ला, देहाआव भिटामिन सिआ बाङाइ जायोब्ला खर'नि खानायनि जेंना जायो। बेनि थाखाय जानाय-लोंनायाव भिटामिन सिखौ आजावनांगौ। भिटामिन सि गोनां फिथायफोर आरो मैगं-थाइगंफोरखौ जायोब्ला इम्युन सिस्टेमआबो गोख्रों जायो। जरखायै आथिखालनि मुलुगनाडै गोसारनाय करना भाइरास इनफेक्सननि समाव इम्युन सिस्टेमखौ गोख्रों लाखिनाया जोबोद गोनांथार।
खर'नि खानायनि जेंनानि थाखाय आमलायआ मख'जाथाव बिहोमा होयो। मोनसे रिसार्चनि बादिब्ला, आमलायआव भिटामिन सिआ गोबां थायो। बेखौ जायोब्ला खर'नि खानायनि जेंनाया जानगारो। लोगोसे गुबुन माखासे बेरामफोरावबो आमलायआ मुलाम्फा गोनां । आमलायआव मुलिनि गोबां गुन दं। आमलायखौ थाइनै थाइथामसो किशमिशजों जयै सोमनानै दोन्नांगौ आरो से घन्टासोनि उनाव उनग्लिना आमलायनि जुसजों गलायना लोनांगौ । बेबादि लोङोब्ला लिपिया बेरामआव जोबोद मोजां जायो।
आथिखालनि हान्था-मेला आरो थांलाय-फैलायनि जाहोनआव सुबुंफोरनाव माइग्रेननि जेंनाया बाङो।जरखायै आइजोफोरनाव हौवाफोरनिख्रुइ बांसिन माइग्रेननि जेंना जायो। माइग्रेननि जेंनायाव आमलायआ गन गोनां। बिब्दिनि थाखाय आमलाय, गलाप बिदै, सिन्दर आरो नीलकमलनि पेस्टखौ खर'आव फोनोब्ला आराम मोनो। आमलायआ मिथिंगायारि मुलि बायदि खामानि मावो। बेयाव एन्टिअक्सिडेन्टनि गुन मोन्नाय जायो, जाय खर'नि खानाय मोन्नायखौ गोसोम जाफिन होनायाव मदत होयो।
