कार्बिआलंनि बर’फोरनो एसटि (हिल्स) होनो थाखाय एबसुआ मिरु सरकारखौ नारसिनगासिनो : दिपेन बर’

कक्राझार, 17 अक्टबरः दुलाराय बर' फरायसा आफादआ गोबाव बोसोर समनिफ्राय बर’फोरनि गासै जेंनाखौ बोस्रांनो थाखाय गसंथेबोनायजों लोगोसे बर' बिजोंनि सोलोंथाय बिथिंखौ फोजौखांनायनि थांखिजों गुन गोनां सोलोंथाय मावथांखिखौ सिगाङाव दोन्नानै बानाय आरो मेंनाय गैयालासे खामानि मावबोदों। थांनाय 27 जानुवारी, 2020 अक्टखालि जानानै थांनाय बिटिआर गोरोबथानि गेजेरजों बे समाव दुलाराय बर' फरायसा आफादनि नाजाबोनाय आरो हास्थायबोनाय बर' बिजोंनि सोलोंथाय जेंनाया बोस्रांजानायनि लामायाव फैबाय। बिटिआर गोरोबथानि दफायाव मख'खानाय बादियै बर’फोरनि सोलोंथाय जेंना आयदा जेरै भेन्सार फरायसालि, फरायसालिमाफोरखौ सरकारि खालामनाय आरो फोरोंगिरिफोरनि जेंना आयदाया बिटिआर गोरोबथानि गेजेरजों बोस्रांजासिगोनखौ नोजोर बोनानै दासान्दि, दुलाराय बर' फरायसा आफादआ बिटिआरनि दरब्रै जिल्ला आरो बिटिआरनि बाइजोआव थानाय दाब-दाब जिल्लाफोराव सोलोंथाय थासारि आयदानि सायाव सावराय मेल खुंबोबाय थादों। दिनैबो कार्बिआलं जिल्ला दुलाराय बर' फरायसा आफादनि बान्जायनायाव जिल्लानि सिङाव थानाय लांहिननि बर' बिजों गोजौ फरायसालिआव कार्बिआलं जिल्लानि बर' बिजोंनि सोलोंथाय थासारिनि सायाव फोरोंगिरिफोरखौ लानानै मोनसे गोनांथार सावरायमेलआ जानानै थाङो। कार्बिआलं जिल्ला एबसुनि आफादगिरि जनास बसुमतारिनि मासि सामलायनानै दैदेन्नाय बे सावराय मेलआव बिटिआर गोरोबथानि 6.3 दफायाव मख'नाय बादियै बिटिआरनि बाइजोआव थानाय बर' बिजोंनि भेन्सार गुदि, गेजेर, गोजौ फरायसालि आरो गोजौसिन गेजेर फरायसालिजों लोगोसे फरायसालिमाफोरखौ सरकारि खालामनायनि सायाव गुवारै सावरायनाय जायो।

मिरु एबसुनि बारग' लेङाइ आफादगिरि रमिअ पि नार्जारिनि गेवलां मेल बेखेवना होनाय बे सावराय मेलआव गाहाय आलासि महरै बाहागो लायो-दुलाराय बर' फरायसा आफादनि आफादगिरि दिपेन बर'आ। गाहाय आलासि महरै बाहागो लानानै एबसुनि आफादगिरि दिपेन बर'आ गावनि बिबुंथियाव थांनाय गोलाव समाव बर' हारिनि खौसेथि, सिनायथि, थामोन्था आरो रैखाथिनि थाखाय आलादा राइज्योनि सोमावसारनायाव अराय सम एबसुखौ साया महरै मदद होबोबाय थानायनि थाखाय राइजो-राजाफोरनो साबायखर बाउग्रोनानै बिथाङा बुङोदि, बिटिआर गोरोबथाखौ बोहैथि बोसोरनि थांनाय 27 जानुवारी अक्टखालि एबसु, एनडिएफबिनि मोनब्रै हान्जा आरो इउबिपिअआ आसाम सरकार आरो भारत सरकारजों जाय थांखिखौ लानानै खालामनाय जादोंमोन बे थांखिनिफ्राय इयुनआवबो माब्लाबाबो दोरोदनाय नङा । एरैहाय कार्बिआलंनि बर’फोरनो एसटि (हिल्स) होनांगौ होन्नानै बिटिएडि गोरोबथायाव मख'नाय दङमोनब्लाबो थांनाय 17 बोसोरआव बेखौ मावफुंनाय जायाखिसै। बेनिखायनो कार्बिआलं जिल्लायाव भारत उदांस्रिनि सिगांनिफ्राय राइज्यो जाबोनाय बर' फिसाफोरा जाहाथे एसटि हिल्स लानानै भारतनि संबिधानआव होनायबादि कार्बि हारिफोर बादिनो समानै आवगायनो हायो बेनि थाखायनो बिटिआर गोरोबथानि 6.1 दफायाव मख'नाय बाथ्राखौ जाहाथे फैगौ गोजां बोथोरनि पार्लियामेन्ट जथुमआव गनायथि होयो बेनि थाखाय एबसुआ मिरु सरकारखौ नारसिनबोगासिनो थादों होन्नानै बर'आ बुंबावोदि, बावैसो सान सिगांनिफ्राय दिनैसिम बिटिआर गोरोबथानि मोन 6नि बांसिन दफाफोरखौ मावफुंनायजों लोगोसे बिटिआरनि बाइजोआव थानाय बर’फोरनि थाखाय बि के डब्लिउ ए सिखौ थांनाय 7 अक्टबरखालि आसाम सरकारआ केबिनेटनि गेजेरजों गनायथि होनायनि थाखाय आसाम सरकारनिसिम साबायख'र जासियो आरो फैगौ समाव बर' बिजोंनि भेन्सार फरायसालि आरो फरायसालिमाफोरा सरकारि खालामजाजोबगोन होन्नानै फोरमायबावो।

शुक्रबारखालि भेन्सार फरायसालि आरो फरायसालिमाफोरनि फोरोंगिरिफोरखौ लानानै गोनांथार सावराय मेलआव कार्बिआलं जिल्ला बर' थुनलाइ आफादनि आफादगिरि, हारिमु आफादनि आफादगिरि, टं नंभे फरायसालिमानि गोरायुं, बारग' बि एल टि वेलफेयार ससाइटिनि दैदेनगिरिफोर, कसारि समाजनि आफादगिरि, साहित्य एकाडेमि बान्था मोनगिरि रितुराज बसुमतारि, आइजो अन्साइ आफादनि आफादगिरि, जिल्लानि मेलेमजिबिफोर आरो सा 400 निबो बांसिन फोरोंगिरिफोरा बाहागो लानायजों बे सावराय मेलआ मेहेर गोनाङै जोबलांदों । मेलआव मिरु एबसुनि सोलोंथाय नेहाथारि कास्टम बसुमतारि, लोगो सोलोंथाय नेहाथारि अबित नार्जारि, गेलेमु नेहाथारि गनेश बसुमतारिमोनजों लोगोसे माखासे बिबानगिरि आरो सोद्रोमाफोराबो बाहागो लाफादोंमोन।

बेराफार्से एखे सानखालिनो थामहिनबा दिनै शुक्रबारखालिनो हजाइ जिल्ला दुलाराय बर' फरायसा आफादनि बान्जायनायाव जिल्लानि सिङाव थानाय दिघली मासगाव गेलेग्रा फोथारआव बिटिआर गोरोबथानि दफाफोरखौ मावफुंनाय आरो बि के डब्लिउ ए सिनि सायाव ओन्सोलनि मेलेमजिबि आरो सांग्रां राइजो-राजाफोरखौ लानानै सावरायमेल खुंनाय जायो। हजाइ जिल्ला दुलाराय बर' फरायसा आफादनि आफादगिरि सुनिल बसुमतारिनि मासि लानानै आफाद दैदेन्नाय बे हाबाफारिआव गाहाय आलासि महरै बाहागो लायो मिरु एबसुनि आफादगिरि दिपेन बर'आ। बे मेलआव हजाइ जिल्लानि सिङाव थानाय 105 नि बांसिन गामिनिफ्राय 2,000 नि बांसिन राइजो-राजाफोरा बाहागो लाफैनायजों बे गोनांथार सावराय मेलआ आबुङै खुंफुंजायो।