करनानि थाखाय पार्लियामेन्टनि गोलोम बोथोरनि जथुमाया सेप्तेम्बराव जागायनो हागौ

गोदान दिल्ली, 18 आगस्ट: पार्लियामेन्टनि गोलोम बोथोरनि जथुमाया सेप्तेम्बरनि गिबि सप्ताहनिफ्राय जागायनो हागौ। बे खेबाव सन्देह दङदि, मोन्नै सदननि हाबाफारिआ लोगोसे जानाय नङा। बेराफार्से ससियेल डिस्टेन्सिंखौ नोजोर होनानै सदननि सोद्रोमाफोरनि जथुमानि थाखाय मोन्नो चेम्बार आरो गेलारिबो बाहायनो हागौ। अदेबानि पार्लियामेन्टारि हाबाफारि मन्थ्रि प्रहलाद जशीआ करना बेमारखौ नोजोर होनानै जथुमानि थियारिफोरखौ नाइसंनो थाखाय थांनाय समबारखालि लकसभा आरो राइज्यो सभा सान्नैबो चेम्बारफोराव दावबायो। बेनि सिगां, थांनाय रबिबारखालि राइज्यो सभा सेक्रेटारि मावख'आ बुंदोंमोनदि, गोलोम बोथोरनि जथुमानि समाव गोजौ सदननि सोद्रोमाफोरखौ मोन्नै चेम्बार आरो गेलारिआव जिराय होनाय जागोन।

मख'नो गोनांदि, भारतयारि पार्लियामेन्टनि जारिमिनाव गिबिखेबाव बेबायदि बेबस्था जागोन, जेराव सा 60 सोद्रोमायारि चेम्बाराव जिरायगोन आरो सा 51 सोद्रोमाफोरा राइज्यो सभानि जौसााव जिरायगोन। बिनि अनगायैबो आद्रा थानाय सा 132 सोद्रोमाफोरा लकसभानि चेम्बाराव जिरायगोन । सुलुङाव फोरमायनाय बायदिब्ला, लकसभा सेक्रेटारि मावख'आबो सोद्रोमाफोरखौ जिराय होनो थाखाय बेबायदिनो बेबस्था खालामगासिनो दङ। सरासन्नायै मोन्नै सदनफोराव लोगोसे जथुमा जायो, नाथाय बे खेबाव सरासन्ना नङै थासारिनि जाहोनाव मोनसे सदना फुंनि समाव जिरायगोन आरो नैथि सदननि हाबाफारिया बेलासियाव जागोन। मख'नो गोनांदि, बेमारनि जाहोनाव पार्लियामेन्टनि जथुमायाव जेंना सोमजिदोंमोन आरो थांनाय 23 मार्चआव मोन्नैबो सदनखौ सिमा गैयै समनि थाखाय दोन्थ'नाय जादोंमोन।