कभिडजों कक्राझारआव साथाम सुबुंनि जिउ खहा, गसाइगावआवबो कभिडजों सासे सुबुंनि जिउ खहा

कक्राझार, 23 सेप्तेम्बर: कक्राझार जिल्लानाडै कभिड-19 जों जिउ गोमानाय सुबुंनि सानखोआ मंगलबार मोनाबिलि समसिम गासै सा 24 जाहैबाय। समबारखालि कक्राझार रुपनाथ ब्रह्म देहा फाहामसालिनि आइसिइउआव थानाय सानै करना पजिटिभ रोगि फारियै-अजय रय (57) आरो शंकर बिश्वास (58) खौ जिउ गोमायो होन्नानै मिबथिनाय जादों । बेबादिनो मंगलबारखालिबो गुबुन आरोबाव सासे सुबुङा जिउ गोमानो गोनां जायो। बेखौ लाफानानै कक्राझार जिल्लानाडै करना पजिटिभ रोगिनि बिसानआ गासै सा 3,215 जाहैबाय। अदेबानि बेनि गेजेराव सा 1793 सुबुंफोरखौ फाहामखांनायनि उनाव हगारहरनाय जाबाय आरो गुबुन फार्से गासै सा 326 रोगिफोरखौ जिल्लानि सिङाव थानाय गुबुन गुबुन कभिड केयार फाहामसालिफोराव लाखिनाय जादों।

राइज्यो नाडैनो कभिड-19 नि साग्लोबसारनाया दासान्दि गुवारै गोसारनायनि जाहोनाव गोबां सुबुंफोरा जिउनि खैफोदजों मोगा-मोगि जानांनाय समनि गेजेरावनो भाइरासजों भुगिनांनाय आरो जिउ गोमानाय अन्जिमाया गोबां जाबाय। कक्राझार जिल्ला गसाइगावनि सासे सुबुङा मंगलबारखालि कभिड-19 जों जिउ खहा जायो। मिथिनाय बायदिब्ला कभिडजों जिउ खहा जानाय सुबुंखौ गसाइगाव महकुमानि गर्जान गामिनि थागिबि बिष्णु कुमार बसुमतारि (59) होन्नानै मिथिनाय जादों। सान्नैनि सिगां गावनि न'आवनो देहा फाहामथाय लादोंमोनब्लाबो देहा हालोदआ जेबो सोलायनाय फैयैआव नख'रनि सुबुंफोरा बसुमतारिखौ थांनाय हरनि समाव कक्राझारसिम लाबोनाय समनि गेजेरावनो हरनि 11 रिंगायाव जोबथा हां बोयो। उनाव कक्राझारनि फाहामगिरिया बिनि देहानिफ्राय स्वाब टेस्ट खालामनायनि गेजेरजों कभिड-19 सन्देरदों होन्नानै रोखायै मिथिहोयो आरो बिष्णु कुमार बसुमतारिआ थैनाय समाव गावनि बिसि, फिसाजो आरो नख'रनि बाय-बाहागिखौ बे संसारनिफ्राय नागारना थाङो।