• Home
  • /
  • Regional
  • /
  • कच राजबंसि हारिसानि आफादफोरजों गिबि मन्थ्रिआ जथुमदों, मोन 6 हारिसाफोरनो एसटि होनायनि सायाव मिरु सरकारनो खेंफोरथिखौ गथायगोन : सनवाल

August 26, 2020

कच राजबंसि हारिसानि आफादफोरजों गिबि मन्थ्रिआ जथुमदों, मोन 6 हारिसाफोरनो एसटि होनायनि सायाव मिरु सरकारनो खेंफोरथिखौ गथायगोन : सनवाल

दिसपुर, 25 आगस्ट: कच राजबंशि हारिसाफोरनि माखासे आफादफोरजों दिनै गिबि मन्थ्रि सर्बानन्द सनवालआ मोनसे गोनांथार जथुमनाय जायो। आसाम एडमिनेस्ट्रेटिभ स्टाफ कलेजनि जथुमग्रा न'ब्लांआव जानाय गोनां मेलाव कच राजबंशि हारिसानि आफादफोरा गिबि मन्थ्रि सर्बानन्द सनवालजों मोगा-मोगि सावरायलायनायाव गावसोरनि गुबुन गुबुन दाबिफोरनि गोनां गोसोखांलाइखौ गथायनाय जायो आरो आफादआ बे गोसोखांलाइआव गथायनाय दाबिफोरखौ थाबैनो मावफुंनाय एबा समाधान खालामनायनि राहा लानांगौनि फोसावो।

बे जथुमनायनि जागायजेन्नायाव बिफाननि मन्थ्रि चन्दन ब्रह्मआ गावनि बिबुंथियाव राइज्यो सरकारनि राहा लानाय मोन 6 हारिसानि एसटि दानाय, कमतापुर गावखुंथाय परिषद दाफुंनाय बायदि आयदानि सोमोन्दोयाव थान्दै दोलोनो मिबथिहोयो। जथुमनाय मेलयाव कच राजबंशि जातीय महासभा, दुलाराय कच राजबंशि फरायसा आफाद, कच राजबंशि संग्राम समिटि, दुलाराय आसाम कच राजबंशि लाइमोन फरायसा सन्मिलनी, दुलाराय कच राजबंशि आइजो आफाद, दुलाराय कच राजबंशि सन्मिलनी बायदि आफादनि दैदेनगिरिफोरा गिबि मन्थ्रिखौ राइज्योनि मोन 6 हारिसाफोरनि एसटि खालामनाय, कमतापुर गावखुंथाय परिषद दाफुंनाय बिथिङाव राहा लानो थाखाय फोसावयो।

गासै जातीय आफादजों जथुमनाय मेलयाव गिबि मन्थ्रि सनवालआ कच राजबंशि आफादनि दैदेनगिरिफोरखौ थांनाय 53 बोसोरनि गोजाम जेंनाखौ समाधान खालामनायनि थाखाय गोनांथारै सावरायनायनि गेजेरजों राहा लाबाय थानायखौ साबायखर जासियो। कच राजबंशिफोरजों लोगोसे राइज्योनि गुबुन गुबुन हारिसाफोरनि जेंनाखौ फारियै समाधान खालामनायनि थाखाय गाहाय मन्थ्रि नरेन्द्र मदि, नख'र मन्थ्रि अमित शाह आरो राइज्यो सरकारआ राहा लागासिनो दं होन्नानै गिबि मन्थ्रिआ मेलयाव बुङो।

कच राजबंशि हारिसाजों लोगोसे राइज्योनि मोन 6 हारिसाफोरखौ एसटिनि मान मोन्नो थांनायनि सोमोन्दोयाव रांखान्थि, देहा बिफाननि मन्थ्रि ङ हिमन्त बिश्व शर्मानि आवथायाव दाफुंजानाय मन्थ्रि हान्जाया थाबैनो गुबुन गुबुन हारि-हारिसा आफादफोरजों सावरायलायनाय जागोन होन्नानै रायखांना थांनाय 24 मार्चनिफ्राय करना महामारिया गोसारनाय थासारिनि थाखायनो दिनैनि बायदि जथुमनाय मेल-मिटिंफोरखौ खुंनो हायाखै आरो खामानिफोरा थालांदों होन्नानै गिबि मन्थ्रिआ मेलयाव बुंथियो।

गिबि मन्थ्रिआ लोगोसे बुंबावोदि, एसटि होनायनि फार्से खम समनि गेजेरावनो जोबथा सावरायज्लायनानै मन्थ्रि हान्जाया बे खेंफोरथिखौ मिरु सरकारनिसिम दैथायहरगोन होन्नानै बाथ्रा होदों । गुबुन फार्सेथिं कमतापुर गावखुंथाय परिषद दाफुंनाय बिथिङावबो थाबैनो संबिधाननि गेजेरजों राहा लानाय जागोन होन्नानै गिबि मन्थ्रिआ बुङो। बिधान सभानि गेजेराव बेनि सोमोन्दै थांखि दैखांनानै बेखौ गनायथिनायनि राहा लानाय जादों होन्नानैबो गिबि मन्थ्रिआ बुङो। कच राजबंशि जातीय आफादफोरनि गुबुन गुबुन दाबिफोराव रायखांनाय आयदाखौ गिबि मन्थ्रिआ बुङोदि, आसामनि जातीय जिउनि सानै गेदेमा बीर लाशिद बरफुकन आरो बीर शिलारायनि मुङाव 1 रोजा दंफांनि दाला लुफुंनायनि खामानिखौ दासान्दि जागायजेन्नाय जाबाय।

C M Carbanada Sonowal & Candan Brahma

आसामनि गामि ओन्सोलनि लाइमोनफोरा जाहाथे बिसोर सानै बीर जोहोलावनि बिहोमाखौ लानानै हारि दाफुंनायाव गोख्रों बिफाव लानो हायो बेनि थाखाय राइज्यो सरकारआ सिगां मोन्थायखौ होनायनि राहा लानाय जादों होन्नानै गिबि मन्थ्रिआ बुंबावो। एसटि दाफुंनायजों लोगोसे गुबुन गुबुन जेंनाफोरखौ समाधान खालामनायनि थाखाय सिगांनि मोनसेबो सरकारआ जेबो रोखोमनि राहा लायाखैमोन होन्नानै रायखांना गिबि मन्थ्रिआ आथिखालनि राइज्यो सरकारआ मोनफ्रोमबो आफादनि जेंनाफोरखौ गोजोन सावरायलायनायनि गेजेरजों मावफुंनो थाखाय मिरु सरकारनिसिम राहा लानो मिबथिहोनाय आरो नारसिन्नाय जाबाय होन्नानै बुङो।

गिबि मन्थ्रिआ गावनि बिबुंथियाव मोनफ्रोमबो आफादखौ राइज्यो सरकारआ आजावना लानाय राहाफोरखौ फोथायनांगौनि फोसावयो आरो फैगौ बाङाइ समनि गेजेरावनो मन्थ्रि आफादजों आफादफोरनि जोबथा थाखोनि सावरायलायनाया जागोन होन्नानै बाथ्रा होयो। दिनैनि बे सावरायलायनायाव कच राजबंशि जातीय महासभानि गाहाय नेहाथारि बिस्वजित राय, मावफुं आफादगिरि निर्मल राय, आफादगिरि तरनिकान्त राय, आक्रासुनि गाहाय नेहाथारि जिबेस राय, राजबंशि संग्राम समिटिनि गाहाय नेहाथारि दुलाल चन्द्र राय, कच राजबंशि लाइमोन फरायसा आफादनि गाहाय नेहाथारि धर्मेस्वर राय, आफादगिरि बैष्णब कच, कच राजबंशि आइजो आफादनि दैदेनगिरि मालती रायजों लोगोसे गुबुन गुबुन आफादनि गासै मोन 12 आफादनि दैदेनगिरिफोरा गिबि मन्थ्रिजों सावरायलायनाय मेलयाव बाहागो लादोंमोन।

दिनैनि बे सावरायलायनाय समावनो आसाम सरकारनिफ्राय जगायथाय बिफाननि मन्थ्रि पनिभुषन चौधुरि, गिबि मन्थ्रिनि मिडिया बोसोनगिरि ऋषिकेश गस्वामी, गिबि मन्थ्रिनि आइन बोसोनगिरि सान्तनु भराली, जनजाति आरो थाखो अन्साय बिफाननि जुथाय नेहाथारिजों लोगोसे गोजौ थाखोनि बिबानगिरिफोराबो बाहागो लादोंमोन।

Share with your friends!

Related Posts

आसामनि मादावनो मुंदांखा जानो हानाय बगामाति लावखार ओंखाम जाग्रा थावनिखौ दिनै सोरखारि भाबै बेखेवनानै होबाय। 

आसामनि मादावनो मुंदांखा जानो हानाय बगामाति लावखार ओंखाम जाग्रा थावनिखौ दिनै सोरखारि भाबै बेखेवनानै होबाय। 

Ex Volunteers ग्रुबा All Bodo Ex Volunteer Force Organization मुं होना दिनै मिरु आफादखौ गोदानै दाफुंबाय।

Ex Volunteers ग्रुबा All Bodo Ex Volunteer Force Organization मुं होना दिनै मिरु आफादखौ गोदानै दाफुंबाय।

क’क्राझार सोरखारि फरायसालिमायाव ईशान चन्द्र मोसाहारी फोथायफुनजि बेनि सेथि गोसोखां बिबुंसार हाबाफारि खुंदों

क’क्राझार सोरखारि फरायसालिमायाव ईशान चन्द्र मोसाहारी फोथायफुनजि बेनि सेथि गोसोखां बिबुंसार हाबाफारि खुंदों

Grand Assam 2022 आव Ushna Basumatary आ Grand Miss Assam  Eminent 2022 बिमुंखौ मोननो हादों ।

Grand Assam 2022 आव Ushna Basumatary आ Grand Miss Assam  Eminent 2022 बिमुंखौ मोननो हादों ।

Published by

Bodosa


Bodosa is a Daily Newspaper, printed in Bodo language.

Leave Your Comment Here