दिसपुर, 4 सेप्तेम्बरः आसामनि गिबि मन्थ्रि सर्बानन्द सनवालआ थांनाय 3 सेप्तेम्बरखालि आसाम एडमेनिस्ट्रेटिभ स्टाफ कलेजनि जथुमग्रा खथायाव राइज्योनि गुबुन गुबुन हारिसानि थान्दैफोरजों आलादा-आलादायै जथुमनाय जायो। बे जथुमनाय मेलाव आफादफोरनि दैदेनगिरिफोरा दाबि खालामनाय गोसोखांलाइखौ गिबि मन्थ्रिआ आजावनानै बिसोरनि जेंनाफोरखौ सुस्रांनो थाखाय गोनां राहा लागोन होन्नानै बाथ्रा होयो। दुलाराय आसाम कच राजबंशि फरायसा आफादनि मोन्नै हान्जाजों लोगोसे हारिसाखौ दैदेन्नाय मोन 8 आफादनि दैदेनगिरिफोरा गिबि मन्थ्रि सर्बानन्द सनवालखौ कमतापुर गावखुंथाय परिषद दाफुंनायनि आयेनखौ बिधान सभायाव मावफुंनायनि फार्से गोनां राहा लानायनि थाखाय बरायो। गिबि मन्थ्रिआ परिषदखौ थाबैनो मावफुंनायनि थाखाय आसाम सरकारआ गोनांथार राहा लागोन होन्नानै आफादनि दैदेनगिरिफोरनो बाथ्रा होयो।
फार्सेथिं गार' हारिसाखौ दैदेन्नाय मोनब्रै आफादफोर गार' नेसनेल काउन्सिल, गार' फरायसा आफाद, इउनाइटेड गार' नेसनेल काउन्सिल मुभमेन्ट कमिटि आरो गार' साहित्य सभानि दैदेनगिरिफोरा दिनै गिबि मन्थ्रिनि आखाइयाव हारिसानो गावखुंथाय दाफुंनायजों लोगोसे गुबुन गुबुन दाबिफोरनि गांसे गोसोखांलाइखौ गथायदों। गिबि मन्थ्रिआ बुङोदि, आसामनि गोजाम हारिसा गार'फोरनि दुलाराय जौगानायनि थाखाय राइज्यो सरकारआ बिबान दं। सरकारआ बिसोरनि गाहाय दाबि गावखुंथाय दाफुंनायनि आयदाखौ गोगो राहाजों मावफुंनो नाजागोन होन्नानै बाथ्रा होयो।
