कक्राझार, 23 सेप्तेम्बरः ससियेल मेडियानि गेजेरजों खायसे सिनाय मोनै सुबुङा कक्राझार बिगियान फरायसालिमानि गोरायुं ड० रामानन्द सिंहानि हेंथायै फरायसालिमायाव मुं थिसन्नायनि मुडाव बेले- बेजे रां लानायनि अजद खालामदों। फरायसालिमानि गोरायुं ड० सिंहाया बे अजदनि सायाव रोखा खालामना होनायजों लोगोसे थोंजोङै नेवसिगारदों। मख'नो गोनांदि, थांनाय रबिबारखालि खायसे सिनाय मोनै सुबुंफोरा ससियेल मेडियाआव एन डि टि भि बेनारनि सिङाव मुं थिसन्नायनि थाखाय रां लानायाव कक्राझार बिगियान फरायसालिमानि गोरायुंआ आसाम पुलिसजों हमजादों होन्नानै फोसावदोंमोन।
ससियेल मेडियाआव बेबायदि खौरां फोसावनाय बाथ्राखौ थोंजोङै नेवसिगारना ड० सिंहाया गावखौ खायसे सुबुंफोरा गाज्रि मुं सुहोनो थाखाय बेबादि खालामदों होन्नानै खौरांगिरिनि सिगाङाव गोरायुंआ रोखा खालामना होदोंदि, मुं थिसन्नायनि मुङाव दासान्दि सासेबो फरायसाफोरनिफ्राय रां लानाय जायाखै आरो बे जाथाया जेबो नङा होन्नानै नेवसिगारो। गावनि खुंथायाव फरायसालिमाया देहा बिफाननि फोसावनाय गाइडलाइन बायदियैसो सोलिगासिनो दं होन्नानै बुंबावयो।
ससियेल मेडियानि गेजेरजों गावनि सायाव नंखाय खौरां फोसावनाय सुबुंनि हेंथायै गसर थिसन्नाय जाबाय आरो नंखाय खौरां फोसावनायाव लोब्बा थानाय सुबुंनि सायाव गोखों राहा लानो फरायसालिमानि गोरायुंआ दाबि खालामदों। खौरांगिरिनि सिगाङावनो ड० सिंहाया फैगौ बिटिसि बिसायखथिखौ कभिड-19 नि गोसारनायखौ नोजोर होनानै गोख्रों राहानि गेजेरजों खुंनो थाखायबो आसाम सरकार आरो बिसायखथि आयगनिसिम दाबि खालामदों। ओन्सोलनि जौगानाय राहाखौ नोजोर होनानै बिटिसि बिसायखथिखौ थाबैनो खुंफुंनांगौ होन्नानै कक्राझार बिगियान फरायसालिमानि गोरायुंआ फोसावबावयो।
