कक्राझाराव "गन्देगि मुक्ट भारत" अभियाननि गेजेरजों राइजो-राजानि गेजेराव सांग्रांथि मेल गसाइगाव, 14 आगस्टः भारत हादतखौ दरसे साखोन-सिखोन हादत खालामनायनि थांखिजों गाहाय मन्धि नरेन्द्र मदिआ गोजोनै जागायजेन्नाय स्वच्छ भारत मिसननि बाहागो हिसाबै “गन्देगि मुक्ट भारत" अभियानखौ जागायजेन्दों। हादत आरो राइज्योनि गुबुन गुबुन ओन्सोलजों लोगोसे लोब्बा लाखिनानै कक्राझार जिल्लायावबो थांनाय 8 आगस्टनिफ्राय14 आगस्टसिम सप्ताहयारि गुबुन गुबुन हाबाफारिखौ खंनाय जादों। कक्राझार जिल्ला वाटार एन्ड सेनिटेसन कमिटि-डि डब्लिउ एससिनि बान्जायनायाव आरो गसाइगाव-कक्राझार सुबुं देहा कारिकरि बिफाननि हेफाजाबाव समाजयारि जान्थाय हुदाखौ फालिनानै जिल्लानि गुबुन गुबुन गामिनि राइजो-राजाफोरखौ प्लास्टिक बाहायनाय आरो बेखौ नागारनायनि सोमोन्दोयाव सांग्रांथि मेल खंनाय जादों। बे हाबाफारिजों लोगोसे लोब्बा लाखिनानै कक्राझारआबो गसाइगाव महकुमानि मोन 5 गामियाव बाहायनाय प्लास्टिक रोखोमनि बेसादफोरखौ आलादायै लाखिनायनि राहा खालामनायजों लोगोसे दर 5 गामिफोराव साफाय अभियानबो खालामनाय जादों। फार्सेथिं राइजो-राजाफोरखौ गन्देगि मुक्ट भारत आयदानि थांखिजों जिल्लानि गं 10 गामिफोरनि गोनांथार
ओन्सोलफोराव थानाय जायखि-जाया बेरामफोर सिथाबनाय जादों। बेनि अनगायैबो थांनाय 12 आगस्टयाव साखोन-सिखोन आबहावा खालामनायनि थांखिजों गामियारि सुबुंफोरखौ सांग्रांथि होनानै दंफां फुलि गायनाय हाबाफारिजों लोगोसे थांनाय 13 आगस्टयाव फरायसुला-फरायसुलिफोरनि गेजेराव बे आयदानि सायाव अनलाइननि गेजेरजों सावगारि बोनाय आरो रन्साय लिरनायनि बादायलायनायखौ खंनाय जादों। बे बादायलायनायाव 6 थि आरो 8 थाखोनि फरायसाफोरा बाहागो लानानै गाव गावनि रोंगौथिखौ दिन्थिफंनो हादों। 14 आगस्टखालि जिल्लानि गुदि देहा मिरुफोराव साफाय अभियान सुंनाय हाबाफारियाव कक्राझार जिल्ला सुबुं देहा कारिकरि बिफाननि माव' इन्जिनियार आरो डि डब्लिउ एससिनि बिबानगिरि हुदय रन्जन दास, गसाइगाव कारिकरि बिफाननि माव' इन्जिनियार समिन्द्र शर्गियारि, एसबिएमनि नडेल अफिसार मनज नन्दी आरो बिआरसिसि, सिआरनि सोद्रोमाफोराबो बाहागो लानानै अभियाननि गेजेरजों दरसे साखोन-सिखोन हादत खालामनायनि बिबानखौ लानानौ होन्ना फोसावयो।
