कक्राझार, 18अक्टबरः हादतनां थाखोनि मोनसे बादायारि मुं गोनां आन्जाद एबा अल इन्डिया नेसनेल इलिजिबिलिटि एन्ट्रेन्स टेस्ट (नीट)-2020 आन्जादनि फिथाइखौ थांनाय सानखालि फोसावबाय। कक्राझारनि सासे फरायसुलिया बे कम्पेटेटिभ एन्ट्रेन्स आन्जादखौ उथ्रिनो हानानै जायगानि थाखाय गोग्गानाय लाबोनो हादों। कक्राझार जिल्लानि बरुवापारानि गोग्लैसोनाय गामिनि आलिसा हुसेइन मुंनि फरायसुलिया मेडिकेल कर्चनि बे एन्ट्रेन्स आन्जादयाव 720 नम्बरनि गेजेराव 592 नम्बरजों उथ्रिनो हानानै मुंथिसन्नायनि थाखाय जायगा आवग्रिनो हाबाय। 19 बोसोर बैसोनि आलिसा हुसेइनआ एइस एस एल सि आरो एइस एस आन्जादखौ बिगियान आयदायाव निउ बडाइगाव केन्द्रीय बिद्यालयनिफ्राय फारियै 2016 आरो 2018 आव उथ्रिनो हादोंमोन । एइस एस आन्जादखौ उथ्रिखांनायनि उनाव आलिसाआ 1 बोसोर समनि थाखाय गुवाहाटीनि लालन्स कसिं सेन्टाराव मुंथिसन्दोंमोन । आलिसाआ नैथि खेबजों बे कम्पेटेटिभ एन्ट्रेन्स आन्जादखौ उथ्रिसारनो हादों। बियो 2019 आवबो बे आन्जादयाव जिरायदोंमोन, नाथाय बे खेबाव उथ्रिनो हायाखैमोन । एन्ट्रेन्स आन्जादआव उथ्रिसारनो हानायखौ लानानै आलिसा हुसेइनआ जोबोद गोजोन्नाय फोरमायनायजों लोगोसे गावनि बे जाफुंसारनायाव बिमा-बिफानि थोजासे थुलुंगा होनाय आरो बिहोमा दं होन्नानै फोरमायो। आलिसानि बिमा-बिफाया गावसिनि फिसाजोखौ सासे डाक्टार जाहैगोनखौ मिजिंथिनाय फोरमायो।आलिसानि बिफा माजिदुर हुसेइनआ बि एस एफनि सासे सान्थ्रि आरो बियो आथिखालाव सोनाब बंग राइज्योनि सिलिगुरियाव दं। आलिसा हुसेइननि बेफोरबादी नीट आन्जादाव जाफुंसारनाय खौरांखौ मोन्नो हानानै गरिया-मरिया देशि जातीय परिषदनि कक्राझार जिल्ला आफादया बिथांनि न’आव थांनानै बरायहैयो।
