कक्राझार,9 सेप्तेम्बरः बि टि सि बिसायखथिआ फैगौ माखासे समफोरनि गेजेरावनो खुंजानो हासिगौखौ नोजोर बोनानै दासान्दि बि टि सि हालामनि राजखान्थि फोथारावा दुंहाव थासारि सोलिबाय थानाय समनि गेजेरावनो दिनै कक्राझाराव मोनसे दुखुनांथाव जाथाया महर मोनदों। कक्राझार जिल्लानि सिङाव थानाय बिसमुरि पुलिस थानानि 1 किलमिटार जानथायाव 31 नं माहारियारि राजा लामा सेराव सासे सरकारि साख्रि मावग्रा बर’ आइजोखौ बुथारनाय जाथाया नुजाथिदों। सेरफांगुरिनि पमिला नार्जारी मुंनि आइजोखौ थांनाय हराव माखासे सिनायमोनै दुथांफोरा बुथारनानै गालांदों।
मिथिनाय बादिब्ला जाथायजों बोलि जानांनाय पमिला नार्जारीआ कक्राझारआव सेरिकालसार बिफाननि सासे मावसुमामोन आरो बियो सानफ्रामबो ननिफ्राय कक्राझारसिम गावनि खामानियाव थांलाय फैलाय खालामबाय थायोमोन। मंगलबारखालिबो गुबुन सानफोरनिबादि गावनि खामानियाव ननिफ्राय ओंखारबोदोंमोन नाथाय हरसिमावबो नआव सफैफिनाखै होननानै आंगो फिसाज्लाया खौरांगिरिफोरनि सिगाङाव फोरमायथिदों। जाथायखौ खौरां मोननानै मन्थ्रि प्रमिला रानी ब्रह्मआ हरखाबै जाथायथिलियाव नुजाथिहैना बे जाथायनि सायाव गोथौवै दुखु फोरमायनायजों लोगोसे जाथायजों लोब्बा थानाय दायनिगिरिखौ गोख्रोङै संदाननायनि गेजेरजों आयेननि साजा होनायनि राहा लागोन होननानै बुंथियो।
