• Home
  • /
  • National
  • /
  • एलएसिआव चीनआ हाबफैनो नाजाबाय थादों, भारतनि सान्थ्रिफोरा गोखोङै फिन्नाय होगासिनोःराजनाथ

September 16, 2020

एलएसिआव चीनआ हाबफैनो नाजाबाय थादों, भारतनि सान्थ्रिफोरा गोखोङै फिन्नाय होगासिनोःराजनाथ

गोदान दिल्ली, 15 सेप्टेम्बर: थांनाय माखासे दानफोर सिगांनिफ्राय सोमजिनाय भारत आरो चीननि गेजेराव सोलिबोबाय थानाय जेंना थासारिनि आयदाया दासान्दि सोलिगासिनो थानाय संसद जथुमनि मोनसे मख'जाथाव गाहाय आयदा जानानै फैदों। भारत आरो चीननि गेजेराव सोमजिनाय जेंना थासारिखौ लानानै दिनै मिरु रैखाथि मन्थ्रि राजनाथ सिंआ संसद जथुमाव एलएसिनि थासारिनि बागै बिबुंथि लाखिदों।

मन्थ्रि राजनाथ सिंआ फोरमायनाय बादिब्ला, चीननि सान्थ्रिफोरा दासिमबो भारतनि हायाव आयेन बेरेखायै हाबफैनो नाजाबाय थादों आरो भारतनि हाखौ कब्जा खालामनो सोलो बाहायबाय थादों। बिथाङा बुंबावोदि, थांनाय एप्रिल दाननिफ्राय सिमा ओनसोलफोराव चीननि सान्थ्रिफोर आरो हाथियार थिसन्नाया गोख्रोङै बांसिनदों। नाथाय जोंनि सान्थ्रिफोराबो ओरैनो जिरायनानै थायाखै आरो बिसोरखौ खाबु होयाखै। जोंनि सान्थ्रिफोरा आयेन बेरेखायै चीननि साथ्रिफोरनि हाबफैनो नाजानायखौ गले-गले फेलें खालामबाय थादों आरो गोख्रोङै फिन्नाय होबाय थादों। सिमा ओनसोलाव चीननो फिन्नाय होनो थाखाय जोंनि सान्थ्रिफोरा फिन्नाय होफिन्नो थाखाय थियारि। नांगौ रोखोमनि हाथियार आरो सान्थ्रिफोरखौ सिमा ओनसोलाव थिसन्नाय जादों।

Rajnat Shing

जोंनि सान्थ्रिफोरनि सायाव जोंहा गोग्गानाय दं आरो फोथायनाय दं। रैखाथि मन्थ्रि राजनाथ सिंआ संसद जथुमाव बुंबावदोंदि, चीनआ भारतनि खमैबो 38,000 स्किएर हाखौ लाडाकआव कब्जा खालामनानै लानो नाजाबाय थादों। बेनि अनगायैबो 1963 आव जानाय मोनसे सिमा गोरोबथा बादियै पाकिस्तानआबो पि अ केनि 5180 स्किएर भारतनि हाखौ आयेन बेरेखायै चीननो हगारदों। भारत आरो चीन फारनैनिफ्रायबो मावखुलिनि गेजेरजों गनायनानै लादोंदि, सिमा जेंना आयदानि सोंथिया मोनसे आयदा आरो बेखौ  गोजोन सावरायनायनि लामा दिहुन्नायनि गोनांथि दं होन्नानै रैखाथि मन्थ्रि राजनाथ सिंआ फोरमायदों।

Share with your friends!

Related Posts

न’खर न’खर हादरारि फिरफिला बिरहोनाय थांखिजों 24BN SSB नि गोलाव हान्जा सुरनाय ।

न’खर न’खर हादरारि फिरफिला बिरहोनाय थांखिजों 24BN SSB नि गोलाव हान्जा सुरनाय ।

रांखान्थि मन्थ्रिआ मैया मिरुनि बाजेटखौ थिसन्दों

रांखान्थि मन्थ्रिआ मैया मिरुनि बाजेटखौ थिसन्दों

बि टि आरनि सिङाव ओन्सोल सोसनायनि थाखाय आर’जलाइ गथायनायनि समखौ फोलावबाय

बि टि आरनि सिङाव ओन्सोल सोसनायनि थाखाय आर’जलाइ गथायनायनि समखौ फोलावबाय

हादतनि गोबां राइज्योफोराव बार्ड फ्लुआ गिथावनायै गोसारदों

हादतनि गोबां राइज्योफोराव बार्ड फ्लुआ गिथावनायै गोसारदों

Published by

Bodosa


Bodosa is a Daily Newspaper, printed in Bodo language.

Leave Your Comment Here