• Home
  • /
  • BTR
  • /
  • एम पि नब कुमार सरनियानि हेंथायै सिबिआइ आरो एनआइए संदान्नो दाबि

September 27, 2020

एम पि नब कुमार सरनियानि हेंथायै सिबिआइ आरो एनआइए संदान्नो दाबि

भवानिपुर, 27 सेप्तेम्बरः बिटिसिआव राइज्यो बेंगिरिनि खुंथायखौ बोखांना लाफिन्नांगौ आरो राइज्यो बेंगिरिनि खुंथायखौ बारायनाङा आरो सोलिफु बोसोरनि फैगौ 27 अक्टबरनि सिगां बिटिसिआव 4थि बिसायखथिखौ थाबैनो खुनांगौ । बेबादि बाथ्राजों दाबि खालामदों पिपुलस जइन्ट एक्सन कमिटि फर बड'लेण्ड मुभमेन्ट सुंद'यै पिजेएसिबिएमआ। शनिबारखालि बाक्सा जिल्लानि सालबारि लक्ष्मी मन्दिरनि जथुमसालियाव पिजेएसिबिएमनि मिरु आफाद आरो सालबारि जिल्ला आफादनि गेजेरजों खुंनाय मोनसे खौरांगिरि मेलआव बिटिसिआव सोलिबाय थानाय राइज्यो बेंगिरि खुंथायखौ बोखारनाय आरो बिसायख'थिया फासयबाय थानायखौ गोख्रोडै हेंथा होनानै गोबां बाथ्राजों सावरायदों आफादनि दैदेनगिरिया। खौरांगिरि मेलआव मिरु आफादनि लेडाइ गाहाय लिंथुमगिरि बिनाराम बर'आ अजद दैखांनानै बुङोदि, कभिड-19 गोसारनायनि जाहोनाव सोलिफु बोसोरनि थांनाय 4 एप्रिलआव खुंजानो गोनां बिटिसिनि बिसायख'थिखौ राइज्योयारि बिसायख'थि आयगआ दोन्थनानै थांनाय 27 एप्रिलनिफ्राय बिटिसिआव राइज्यो बेंगिरिनि खुंथाय जाबसिन्नाय जादोंब्लाबो फैगौ 27 अक्टबरनि सिगां बिटिसिआव बिसायख'थि खुंनांगौ आरो राइज्यो बेंगिरिनि खुंथायखौ थोंजोडै बोखारनांगौ ।

PJCBM

 फैगौ 27 अक्टबरआव बिटिसिआव सोलिनाय राइज्यो बेंगिरिनि 6 दाननि खुंथाय समा जोबहैगोन । बिटिसिआव राइज्यो बेंगिरिनि खुंथायखौ फिन बारायनाङा आरो बेनि जाहोनाव बिटिसिआव राइज्यो बेंगिरि खुंथायनि समफोराव ओन्सोलनि राइजो-राजाफोरा गुबुन गुबुन रोखोमनि सरकारि खाबुफोरनिफ्राय जानगारनानै दं। राइज्यो बेंगिरिनि सोलिनाय खुंथायनि समाव बिटिसियाव जेबो रोखोमनि जौगाखांनायखौ नुनो मोनाखै। बिटिसिआव राइज्यो बेंगिरिनि खुंथायआ जेसेबांनो बारायबाय थागोन एसेबांनो बिटिसिनि जौगानाया गाहायाव फैबाय थागोन आरो राइजो-राजानि गोरिब-गुन्द्रा थासारियाव सैनांनायखौ नुनो मोनगोन। खौरांगिरि मेलाव पि जे ए सि बि एमनि मिरु दैदेनगिरि बिनाराम बर'आव कभिड-19 नि गोसारनाय समनि गेजेराव बिहार, केरेला बायदि राइज्योफोराव बिसायख'थिखौ खुंगोननि अक्ट'खौ गेवलाङै फोसावनो हादोंब्ला आसामनि राइज्योयारि बिसायख'थि आयगआ बिटिसिआव बिसायखथिखौ मा जाहोननि थाखाय खुंनो हाया होन्नानै सोंथि खालामो। बेनि अनगायैबो बिटिसिआव राइज्यो बेंगिरि खुंथायखौ थोंजोङै बोखारनांगौ आरो बिटिसिआव राइज्यो बेंगिरिनि खुंथायआ गोनांथि गैया होन्नानै दाबि खालामो।

मख'नो गोनांदि, खौरांगिरि मेलआव कक्राझार लक सभा बियाबनि एमपि नब' कुमार सरनियाखौ हारियारि सुबुंफोरनि गेजेराव गोजोन, जौगानाय बिथिङाव हेंथा होग्रा गुबुन सासे फाव फान्दायसुला होन्नानै बुंनायजों लोगोसे एम पि सरनियानि हेंथायै सिबिआइ, एनआइएनि संदान्नो दाबि खालामबावयो। बिनाराम बर'आ बुंबावयोदि, थांनाय 22 सेप्तेम्बरखालि खौरां बिजोंनि गेजेरजों एम पि नब' कुमार सरनियानिनो लोगो दाफुंनाय आरो बिटिएडि आर्मिनि बाक्सा जिल्लानि कामान्डार धनन्जय सरनियाया जेरैबायदि नब' कुमार सरनियानि सायाव अजद खालामदों बेनि सायाव गोख्रों संदान्नांगौनि गोनांथार होन्नानै बुङो । खौरांगिरि मेलआव पिजेएसिबिएमनि दैदेनगिरि प्रमद बसुमतारि, अमृतस्वर लाहारी, सालबारि जिल्ला आफादनि दैदेनगिरि राजेन्द्र बसुमतारि, नेहाथारि राजेन अवारी, लोगो नेहाथारि मनिन बर'आबो बाहागो लादोंमोन।

Share with your friends!

Related Posts

आसामनि मादावनो मुंदांखा जानो हानाय बगामाति लावखार ओंखाम जाग्रा थावनिखौ दिनै सोरखारि भाबै बेखेवनानै होबाय। 

आसामनि मादावनो मुंदांखा जानो हानाय बगामाति लावखार ओंखाम जाग्रा थावनिखौ दिनै सोरखारि भाबै बेखेवनानै होबाय। 

Ex Volunteers ग्रुबा All Bodo Ex Volunteer Force Organization मुं होना दिनै मिरु आफादखौ गोदानै दाफुंबाय।

Ex Volunteers ग्रुबा All Bodo Ex Volunteer Force Organization मुं होना दिनै मिरु आफादखौ गोदानै दाफुंबाय।

क’क्राझार सोरखारि फरायसालिमायाव ईशान चन्द्र मोसाहारी फोथायफुनजि बेनि सेथि गोसोखां बिबुंसार हाबाफारि खुंदों

क’क्राझार सोरखारि फरायसालिमायाव ईशान चन्द्र मोसाहारी फोथायफुनजि बेनि सेथि गोसोखां बिबुंसार हाबाफारि खुंदों

Grand Assam 2022 आव Ushna Basumatary आ Grand Miss Assam  Eminent 2022 बिमुंखौ मोननो हादों ।

Grand Assam 2022 आव Ushna Basumatary आ Grand Miss Assam  Eminent 2022 बिमुंखौ मोननो हादों ।

Published by

Bodosa


Bodosa is a Daily Newspaper, printed in Bodo language.

Leave Your Comment Here