गोदान दिल्ली, 15 सेप्तेम्बर: फैगौ 1 बोसोर समनि थाखाय हादरनि सिङाव थानाय साफ्रोमबो एमपिफोरनि दानयारि बान्थाखौ 30 जौखोन्दो बाङाइ खालामनाय जागोन । बे थिरांथाया फैगौ 1 बोसोरनि थाखाय बाहायजागोन आरो बेखौ मावफुंनो थाखाय मंगलबारखालि लकसभायाव मोनसे बिल लाबोनानै बारहोयो। दानयारि बान्थाजों लोगोसे गुबुन गुबुन सुजुग जुबिदा आरो खाबुफोराबो दानजाबावगोन।
सोदांनाय आइन 2020 नि गेजेरजों पेन्सन मोनग्रा एमपिफोरनि मोन्नो गोनां पेन्सनखौबो दान्नायनि बाथ्रा । बेखौ मावफुंनो थाखाय थांनाय समबारखालि लकसभायाव बिल लाबोनाय जादोंमोन । अदेबानि बे बोसोरनि सिगां बोहैथि मदि सरकारआ मन्थ्रिफोरनि दानयारि बान्था आरो सुजुग-सुबिदाखौ लानानै मोनसे अर्डिनेन्स लाबोदोंमोन। जायनि गेजेरजों मन्थ्रिफोरनि 30 जौखोन्दो दानआरि बान्थाजों लोगोसे गुबुन गुबुन खाबुफोरखौ 2020 माइथायनि 1 एप्रिलनिफ्राय बाहायजानायनि बाथ्रामोन। नाथाय बेनि गेजेरावनो 5 एप्रिलखालि गाहाय मन्थ्रि नरेन्द्र मदिनि मासि दैदेन्नायाव थि खालामजानाय थांखिखौ मावफुंनो गनायथि होयो। केबिनेटआ थांखि लानाय बादिब्ला, एमपिफोरनि जायगानि जौगाखां फान्डखौबो फैगौ 2 बोसोरनि थाखाय दोन्थ'नाय जागोन।
गुबुन फार्से इन्फर्मेसन एन्ड ब्रडकास्टिं बिफाननि मन्थ्रि प्रकाश जाबड़ेकारआ खौरांगिरिफोरजों जानाय मोगा-मोगिआव बुंनाय बादिब्ला, हादरगिरि रामनाथ कबिन्द आरो लेङाइ हादरगिरि भेंकाया नाइडु आरो राइज्यो बेंगिरिफोरा गावसिनि मोन्नो गोनां दानयारि बान्थानिफ्राय 30 जौखोन्दो दानख'नानै लाखिनो गनायथि होदों। मन्थ्रि जाबड़ेकारआ मिबथिहोनाय बादिब्ला, 2 बोसोरनि थाखाय एमपिफोरनि फान्ड बन्द खालामथ'नाय गासै 7,900 कौटि रांखौ हादरनि अन्सुथाय फान्डआव बाहायनाय जागोन।
