कक्राझार, 11 अक्टबर: कक्राझार लक’सभानि बारग' एम पि सानसुमा खुंगुर बैसोमुथियारिआ बावैसो सान सिगां गहपुरआव एबसुनि बारग' दैदेनगिरिनि न'आव बुफाय-बुसि खालामनाय आरो गाग्लोबनाय जाथायखौ गोथौवै दुखु मोननाय फोरमायनायजों लोगोसे बे जाथाया बर' समाजनि थाखाय जोबोद दुखुनांथाव आरो बेयो मोनसे राजखान्थियारि खैसार खालामनाय होन्नानै गोख्रों रावजों अजद होदों। शनिबारखालि कक्राझार प्रेस क्लाबआव मोनसे खौरांगिरि मेल हांख्रायनायनि गेजेरजों बारग' एम पि बैसोमुथियारिआ एबसुनि बारग' दैदेनगिरि बुद्धिराम बसुमतारिनि नख'रआव गाग्लोबनाय जाथायखौ गोख्रों रावजों सोंखारियो आरो एबसुनि बारग' दैदेनगिरिफोरनि सायाव राजखान्थियारि खैसार खालामनानै बेबादि गाग्लोबनाय आरो सोंखारिनायखौ बन्द खालामनो सांग्रांथि होयो।
बेजों लोगोसेनो बैसोमुथियारिआ बावैसो सान सिगां राइज्योनि केबिनेटआ आसामनि गेजेराव बर' कसारि वेलफेयार अटनमास काउन्सिल गायसन्नायनि थाखाय गनायथि होनायखौबो गोजोन्नाय गैयै फोरमायदों। लोगोसे हादरआव बर' रावआ गोबां बोसोर सिगांनिफ्राय भारत संबिजिरनि 8 थि फारिलाइयाव थिसनजादों। नाथाय मानो दासो राइज्योआव लोगो मावख'यारि राव महरै गनायथि होजाखो? राइज्यो सरकारआ राइज्योनि मोन 6 हारिफोरनो एस टि होनो सिगांफार्से आवगायनायनि सायावबो बैसोमुथियारिआ गोजोन्नाय गैयै फोरमायनायजों लोगोसे एस टि होनायनि सिगां गले-गले सानग्रोनो राइज्यो सरकारखौ खावलायो। बेराफार्से बि टि सिआव दासान्दि मडेल कड अफ कन्डाक्ट सोलिगासिनो थानाय समाव बि टि सिखौ माबोरै बि टि आर मुङाव सोलायनो हाखो होन्नानै राइज्यो बेंगिरि आरो राइज्यो सरकारनिसिम सोंथि दैखांनानै बेयो कड अफ कन्डाक्टखौ सिफायनायनि अजद होबावो। बारग' एम पि बैसोमुथियारिआ फैगौ 15 अक्टबरआव कक्राझारनि खोदोमतलायाव थानाय निर्भाना गार्डेनआव बारग' एबसुनि दैदेनगिरिफोर, मावथिफोर आरो मेलेमजिबिफोरनि नैथि जर'खा सावरायमेल खुंनाय जागोन होन्नानैबो खौरांगिरि मेलनि गेजेरजों फोरमायथियो।
