कक्राझार, 13 नभेम्बर: मिरु दुलाराय बर' फरायसा आफादनि गाहाय नेहाथारि आरो बिटिआर गोरोबथानि सागानगिरि लरेन्स इसलारिनि दैदेन्नाय मिरु एबसुनि मोनसे हान्जाया 12 नभेम्बरखालि बिटिसिनि सोलोंथाय नेहाथारिखौ लोगो हमनानै सोलोंथायनि गोबांथार जेंना आयदाफोरनि सायाव गुवारै सावरायलायनाय जायो। बिटिसिनि सोलोंथाय नेहाथारि अमरज्यति बर्मननि मासि सामलायनानै दैदेन्नाय बे सावराय मेलआव बिटिआरनि सिङाव थानाय बर' बिजोंजों लोगोसे गुबुन गुबुन बिजोंनि गुदि, गेजेर, गोजौ, सेनियर सेकेन्डारि, जुनियर कलेज, बिएड कलेज, ल' कलेज आरो डिग्री कलेजनि सायाव फिथाइ गोनाङै गुवारै सावरायलायनाय जायो।
अदेबानि बे सावरायमेलआ गुबैयै बोहैथि बोसोरनि थांनाय 27 जानुवारी, 2020 अक्टआव जानानै थांनाय बिटिआर गोरोबथानि 6.3 दफायाव मख'नाय बादियैनो सावरायनाय जादों। बे सावरायनायनि गेजेरजों मिरु एबसुआ बिटिआर ओन्सोलनि सिङाव थानाय गासै भेन्सार गुदि, गेजेर, गोजौ फरायसालि, सेनियर सेकेन्डारि, जुनियर कलेज, बिएड कलेज, ल' कलेज आरो डिग्री कलेजफोरखौ 100 जौखोन्दो प्रभिन्सियेलाइस एबा सरकारि खालामजोबनो हायो बेनि थाखाय मोन 16 दफाफोरखौ लानानै बिटिसिनि सोलोंथाय नेहाथारिनो गांसे गोसोखांलाइ गथायो। बे सोलोंथाय आयदाखौ लानानै सावरायनाय मेलआव बिटिसिनि सोलोंथाय बिफाननि बिथोनगिरि, कक्राझार, चिरां, बाक्सा, उदालगुरि जिल्लानि स्कुल इन्सपेक्टर आरो गुदि सोलोंथाय मावख'गिरिफोर आरो बर' थुनलाइ आफादनि आफादगिरि, गाहाय नेहाथारिजों लोगोसे सोलोंथाय बिफाननि गोबां गोजौ थाखोनि बिबानगिरिफोराबो दंफायोमोन। बे सावराय मेलआवनो मिरु एबसुनिफ्राय लेङाइ आफादगिरि जयन्त बसुमतारि, बुंथिगिरि पनिन बर', लोगो गाहाय नेहाथारि खोरोमदाव औवारि, सोलोंथाय नेहाथारि क्साटम बसुमतारि, लोगो सोलोंथाय नेहाथारि अबिट नार्जारि आरो सुबुं फोनांजाब नेहाथारि सोमावसार बसुमतारिआबो बाहागो लादोंमोन।
